19.04.2026 | 23:45
Գետերում նկատվում է ջրի մակարդակի բարձրացում. ՆԳՆ ՓԾ-ն անցել է ուժեղացված ծառայության
Վրաստանի նախագահը չի սատարի «Օտարերկրյա գործակալների մասին» նոր օրենքը
Քաղաքականություն
22.02.2023 | 17:30
Վրաստանի նախագահ Սալոմե Զուրաբիշվիլին հայտարարել է, որ չի աջակցի Վրաստանի խորհրդարանում հակաարևմտյան պատգամավորների խմբի նախաձեռնած օրինագծին, որը կարգավորում է ԶԼՄ-ների և հասարակական կազմակերպությունների գործունեությունը, գրում է VOA-ն։
«Այն ժամանակ, երբ պատրաստվում է Եվրահանձնաժողովի 12 հանձնարարականների կատարման նախնական գնահատականը, երբ փետրվարի 24-ի մոտեցումն ասոցացված եռյակի բոլոր երեք երկրների համար (Վրաստան, Մոլդովա և Ուկրաինա) ավելի ու ավելի հրատապ է դարձնում եվրոպական ապագայի հարցը, հենց այս ժամանակն է քաղաքական խմբերից մեկն ընտրում նախաձեռնել օրենք, որն իր բովանդակությամբ մեզ մոտեցնում է ոչ թե Եվրոպային, այլ Ռուսաստանի արատավոր մոդելին»,- ասված է նախագահի աշխատակազմի կայքում հրապարակված հաղորդագրության մեջ։
Զուրաբիշվիլին նաև ուշադրություն է հրավիրում այն փաստի վրա, որ օրինագիծը խորհրդարանում գրանցվել է ամերիկացի սենատորներ Ժան Շահենի և Դիկ Դուրբինի՝ Վրաստան կատարած այցի ժամանակ։
«Մենք իսկապես չենք կարող այդ ամենի մեջ մեղադրել պատահականությանը: Հայտնվել է մի ուժ, որը Վրաստանի եվրոպական ուղին ամրապնդելու փոխարեն՝ Վրաստանի շահը համարում է մեկ այլ ճանապարհ»,- ասված է Վրաստանի նախագահի հայտարարության մեջ։
Հատկանշական է, որ փետրվարի 20-ին Վրաստանի խորհրդարանում գրանցվել է արտաքին ազդեցության թափանցիկության մասին օրենքի նախագիծ։ Նախաձեռնությունը պատկանում է «Ժողովրդի իշխանություն» շարժմանը, որը բաղկացած է իշխող «Վրացական երազանք»-ի նախկին անդամներից, որոնք, չնայած անցյալ տարվա հունիսին իշխող կուսակցությունից անջատվելուն, շարունակում են մնալ խորհրդարանական մեծամասնության մաս։
Տաթև Ֆռանգյան
