18.12.2025 | 13:59
Թուրքիան ցանկանում է վերադարձնել ռուսական C-400-ները. Էրդողանը հարցը քննարկել է Պուտինի հետ. Bloomberg
Մեզ Թուրքիայում շատ լավ էին վերաբերվում․ փրկարար․ ՏԵՍԱՆՅՈՒԹ
Հասարակություն
20.02.2023 | 13:00
«Մեզ Թուրքիայում շատ լավ էին վերաբերվում»,- այս մասին այսօր հրավիրված ասուլիսում հայտարարեցին Թուրքիայում և Սիրիայում իրենց առաքելությունն ավարտած Փրկարարական ծառայության աշխատակիցները՝ անդրադառնալով հարցին, թե ինչպես էին վերաբերվում հայ փրկարարներին։
Ճգնաժամային կառավարման ազգային կենտրոնի օպերատիվ հերթափոխի պետ, փրկարարական ծառայության փոխգնդապետ Հարի Արղամանյանը հավաստիացրեց, որ առաջին իսկ պահից՝ լավ վերաբերմունքի են արժանացել․ միայն երախտիքի ու շնորհակալության խոսքեր են հնչել՝ թե՛ անցորդներ կողմից, թե՛ տեղամասում համատեղ աշխատողների կողմից։
Նշենք, որ հայ փրկարարները Թուրքիայում փլատակների տակից հանել և փրկել են երեք քաղաքացու։
Արղամանյանի խոսքով՝ փետրվարի 6-ի ավերիչ երկրաշարժից հետո Թուրքիան և Սիրիան դիմել են ՄԱԿ հումանիտար օգնության համար։ Փետ րվարի 7-ին ՀՀ կառավարությունը որոշում է կայացրել որոնողափրկարարական թիմեր ուղարկել երկու երկրներ։ Փետրվարի 8-ին 27 և 29 մարդուց բաղկացած խմբերը (բժիշկներ, կինոլոգներ, ճառագայթային և քիմիա-կենսաբանական մոնիթորինգի մասնագետներ) մեկնել են օգնության։ Թիմերը տեղակայվել են Ադըյամանում (Թուրքիա) և Հալեպում (Սիրիա)։
Մեկ շաբաթվա ընթացքում հայ փրկարարները Թուրքիայում փրկել են երեք տուժածի։ Երկու երկրներում փլատակների տակից հանել են 20 մարմին։ Հալեպում փրկարար աշխատանքներին զուգահեռ հայ համայնքի ներկայացուցիչներին ուսուցանվել է, թե ինչպես պահեն իրենց երկրաշարժի ժամանակ։
Փրկարար խմբերը փետրվարի 14-ին վերադարձել են Հայաստան, Սիրիայից՝ ինքնաթիռով, Թուրքիայից՝ ավտոմեքենայով։ Թուրքիայում աշխատել է 74 խումբ 40 երկրներից։ Սիրիայում՝ 8 թիմ 5 երկրից։ Վերջին տվյալներով՝ երկու երկրներում զոհերի թիվը գերազանցել է 50 հազարը»։
Մանրամասները՝ տեսանյութում։
