20.02.2026 | 15:30
Իրանում առնվազն 26 ցուցարար մահապատժի է դատապարտվել. Iran Human Rights
Մեծ Բրիտանիայում ՀՀ դեսպանը Եվրոպայի հարցերով պետնախարարի հետ քննարկել է Ադրբեջանի կողմից Լաչինի միջանցքի արգելափակումը
Քաղաքականություն
08.02.2023 | 12:49
Մեծ Բրիտանիայի և Հյուսիսային Իռլանդիայի Միացյալ Թագավորությունում ՀՀ դեսպան Վարուժան Ներսիսյանը հանդիպել է Եվրոպայի հարցերով պետնախարար Լեո Դոքերթիի հետ և քննարկել Ադրբեջանի կողմից Լաչինի միջանցքի արգելափակումը։
«Ուրախ էի հանդիպել նախարար Լեո Դոքերթիին և քննարկել Միացյալ Թագավորության ու Հայաստանի օրակարգի մի շարք հարցեր։ Նախարարի ուշադրությունը հրավիրեցի Ադրբեջանի կողմից Լաչինի միջանցքի շրջափակման հետևանքով ԼՂ-ում ստեղծված արտակարգ հումանիտար իրավիճակի վրա և ընդգծեցի միջազգային հանրության կողմից Ադրբեջանի վրա շարունակական ճնշումների անհրաժեշտությունը՝ հասնելու միջանցքի անվերապահ և անհապաղ ապաշրջափակմանը»,- գրել է դեսպան Ներսիսյանը թվիթերյան իր էջում։
Հավելենք, որ ավելի վաղ Դոքերթին հեռախոսազրույց է ունեցել Ադրբեջանի ԱԳ նախարար Ջեյհուն Բայրամովի հետ։ Դեռևս հունվարին Դոքերթին հեռախոսազրույց է ունեցել նաև ՀՀ ԱԳ նախարար Արարատ Միրզոյանի հետ։ Նա համայնքների պալատում անդրադարձել էր Լաչինի միջանցքի փակմանը՝ նշելով, որ այն պետք է բացվի։
«Մենք ձգտում ենք վերադառնալ բանակցություններին և Լեռնային Ղարաբաղի հակամարտության խաղաղ կարգավորմանը։ Հունվարի 18-ին ես խոսել եմ Հայաստանի արտգործնախարար Միրզոյանի հետ այնտեղ հումանիտար իրավիճակի վերաբերյալ, և երեկ հանդիպել եմ Ադրբեջանի դեսպանին ու նշել Լաչինի միջանցքի անհապաղ վերաբացման հրատապ անհրաժեշտությունը։ «Սթարթ» հիմնադրամը, որի համար Միացյալ Թագավորությունը նշանակալի դոնոր է, հատկացրել է 350,000 ֆունտ՝ իրավիճակից տուժածներին աջակցելու համար»,- ասել էր բրիտանացի նախարարը։
Դոքերթին նշել էր, որ պատրաստվում է այցելել տարածաշրջան։
Էմմա Չոբանյան
