09.09.2026 | 12:23
Ուկրաինական ԱԹՍ-ները գրոհել են Նովոռոսիյսկը․ զոհվել է 4, վիրավորվել՝ 29 մարդ
Միացյալ Թագավորության պետնախարարն ու Ադրբեջանի ԱԳ նախարարը քննարկել են Լաչինի միջանցքում տիրող իրավիճակը
Քաղաքականություն
07.02.2023 | 11:54
Ադրբեջանի ԱԳ նախարար Ջեյհուն Բայրամովը հեռախոսազրույց է ունեցել Միացյալ Թագավորության Եվրոպայի հարցերով պետնախարար Լեո Դոքերթի հետ։ Ադրբեջանի ԱԳՆ-ն հայտնում է, որ Բայրամովը տեղեկացրել է «Լաչինի միջանցքում իրավիճակի ու Հայաստանի սադրանքների մասին ու նշել, որ Արցախում հումանիտար ճգնաժամ չկա, միջանցքն էլ փակ չէ»։
Կողմերը նաև քննարկել են երկկողմ օրակարգի հարցեր, տարածաշրջանում իրավիճակը, Հայաստանի ու Ադրբեջանի միջև խաղաղության գործընթացի հեռանկարները։
Հավելենք, որ դեռևս հունվար ամսին Դոքերթին հեռախոսազրույց էր ունեցել նաև ՀՀ ԱԳ նախարար Արարատ Միրզոյանի հետ։ Նա համայնքների պալատում անդրադարձել էր Լաչինի միջանցքի փակմանը նշելով, որ այն պետք է բացվի։
«Մենք ձգտում ենք վերադառնալ բանակցություններին և Լեռնային Ղարաբաղի հակամարտության խաղաղ կարգավորմանը։ Հունվարի 18-ին ես խոսել եմ Հայաստանի արտգործնախարար Միրզոյանի հետ այնտեղ հումանիտար իրավիճակի վերաբերյալ, և երեկ հանդիպել եմ Ադրբեջանի դեսպանին և նշել Լաչինի միջանցքի անհապաղ վերաբացման հրատապ անհրաժեշտությունը։ «Սթարթ» հիմնադրամը, որի համար Միացյալ Թագավորությունը նշանակալից դոնոր է, հատկացրել է 350,000 ֆունտ ստերլինգ՝ իրավիճակից տուժածներին աջակցելու համար»,-ասել էր բրիտանացի նախարարը։ Դոքերթին նշել էր, որ պատրաստվում է այցելել տարածաշրջան։
Էմմա Չոբանյան
