Ինչ իրավիճակ է Հալեպում ավերիչ երկրաշարժից հետո. պատմում է «Գանձասար»-ի խմբագիրը. ՏԵՍԱՆՅՈՒԹ

Սիրիայում տեղի ունեցած երկրաշարժի հետևանքով զոհերի թիվը հասել է 403-ի, իսկ վիրավորներինը՝ 1,284-ի։ Մահացածներից երկուսն ազգության հայ մայր և որդի են։ Նշվում է, որ առավոտյան երկրաշարժից հետո 25 հետցնցում է գրանցվել։

Հալեպում լույս տեսնող «Գանձասար» պարբերականի խմբագիր Զարմիկ Պողիկյանը Factor.am-ին փոխանցեց, որ չնայած Հալեպում խուճապային տրամադրությունները մեղմացել են, սակայն մտահոգությունն առկա է․ անկանխատեսելի հետցնցումներ են գրանցվում։

«Համարյա բոլորն իրենց բնակարաններից հեռացել են, հատկապես նրանք, որոնք բարձր հարկերում են բնակվում, և ապաստանել են հայկական տարբեր կենտրոններում։ Իրար մխիթարելով՝ փորձում են այս դժվար օրն անցկացնել»,- ասաց նա։

Պողիկյանի խոսքով՝ կան մի քանի տասնյակ վիրավորներ, որոնք թեթև վնասվածքներ են ստացել։ Վնասվել են հայկական մի շարք կառույցներ և եկեղեցիներ, որոնք վերանորոգման կարիք ունեն։

Սիրիայի նախագահը երկրում արտակարգ դրություն է հայտարարել։ Այն մարդկանց, որոնք բնակարաններ են կորցրել, պետությունը պարտավորվել է կեցության վայրեր հատկացնել, ինչպես նաև առողջական և հոգեբանական օգնություն տրամադրել։ Հայկական համայնքային կազմակերպությունները նույնպես հայտնել են, որ պատրաստ են ապաստան տրամադրել անօթևան քաղաքացիներին։

Զարմիկ Պողիկյանը նաև նշեց, որ համայնքը տնտեսական օգնության կարիք ունի, որպեսզի վնասները վերականգնվեն և մարդկանց անհրաժեշտ բժշկական պարագաններ տրամադրվեն։

Մանրամասները՝ տեսանյութում։

Անի Թամրազյան