22.11.2024 | 23:39
Անպատասխանատվության բացառիկ դրսևորում է. Փաշինյանը՝ Գյումրիում ստեղծված իրավիճակի մասին. ՏԵՍԱՆՅՈՒԹ
Աննախադեպ իրավիճակ է՝ ՌԴ-ն վտարում է ինքն իրեն ՀՀ-ից․ անվտանգային այլընտրանք պիտի ձևավորենք՝ Արևմուտքի հետ գործակցելով․ Էդգար Վարդանյան․ ՏԵՍԱՆՅՈՒԹ
Քաղաքականություն
06.02.2023 | 20:17
Այն, որ ՌԴ ԱԳ նախարարն ասում է, թե ՀՀ-ն Ադրբեջանի յոթ շրջաններն «օկուպացրել» էր, հետևաբար՝ ՀԱՊԿ-ի անդամներն Ադրբեջանի ագրեսիան չեն դատապարտել, ի՞նչ է նշանակում քաղաքական իմաստով։ Կարելի՞ է սա ադրբեջանական վերջին զավթումների փաստի արդարացում որակել, չէ՞ որ ՀԱՊԿ-ի կանոնադրությունում ամեն ինչ հստակ է՝ հարձակումը դաշինքի որևէ անդամի վրա հարձակում է ՀԱՊԿ-ի վրա, այնտեղ գրված չէ՝ դու էլ ուրիշի տարածքը չպիտի օկուպացնես կամ այլ բան։
Քաղաքագետ Էդգար Վարդանյանը Factor TV-ին տված հարցազրույցում ասում է՝ Լավրովի այս պնդումն ամրապնդում է այն թեզը, որ ՌԴ-ն չի գործում կանոնադրությունների և միջազգային սկզբունքների համաձայն, այլ գործում է կուլիսային չգրված խաղի կանոնների շրջանակում․ «Նրանք դնում են մի կողմ ՀԱՊԿ-ի կանոնադրությունը և ասում են, որ Ադրբեջանն իրենցն է, Ալիևն իրենց մարդն է, ՀՀ-ն ինչ-որ բան, կարծես, լավ չի մեկնաբանում կամ ընկալում։ ՌԴ-ի ասածն է՝ իր թշնամին Արևմուտքն է, որի հետ այսօր հակամարտության մեջ է, իսկ Ալիևը թեև մի քիչ չարաճճի է, բայց ամեն դեպքում՝ իրենցն է, և կա նպատակ, որ ամբողջապես իրենցը լինի, որ ուղղվածությունը չթեքվի՝ այլ տեղ գնալով»։
Ըստ քաղաքագետի՝ Արևմուտքի դիրքերը տարածաշրջանում թուլացնելու նպատակով է, որ ՌԴ-ն Թուրքիայի և Ադրբեջանի լոյալությունն է փորձում պահել․ «Ըստ Կրեմլի՝ դա չի նշանակում, որ ՀՀ-ն պետք չէ իրենց, բայց չեն կարող ՀՀ-ին աջակցել, նրա ակնկալիքները բավարարել, որովհետև դա կլինի ի հաշիվ Ադրբեջանի»։
Բայց փաստն այն է, որ ՀՀ-ի աշխարհագրությունն այնպիսին է, որ ոչ թե Շվեդիան կամ ԱՄՆ-ն են նրա թշնամին, որ ՌԴ-ն իր հակաարևմտյան ծրագրի իրագործման համատեքստում աջակցեր, այլ Ադրբեջանն ու Թուրքիան են, որոնցից կա մեծ անվտանգային սպառնալիք։ Երբ ՌԴ-ն հրաժարվում է ՀՀ-ի նկատմամբ ունեցած անվտանգային պարտավորություններից, ի՞նչ է մնում անելու ՀՀ-ին՝ բարձրացնել ձեռքերը և ենթարկվել կոտորածի՞, բնական չէ՞ր ԵՄ-ի դիտորդների գալը։ Արդյո՞ք այս ամենը ՌԴ-ում անալիզ չեն անում։ Էդգար Վարդանյանը վստահ է՝ այս պատկերը գիտեն ՌԴ-ում, բայց անում են այն, ինչ ցանկանում են։
«ՌԴ-ն չի ցանկանա, որ ՀՀ-ն նոր հակամարտության մեջ մտնի, Ադրբեջանի հետ լայնածավալ պատերազմ սկսվի, որովհետև դա անվերահսկելի իրավիճակի կբերի ՌԴ-ի համար։ Ինչո՞ւ ինքը ռիսկի գնա։ Բայց մյուս կողմից էլ, կարծես, նրան ձեռնտու չէ, որ ամբողջությամբ լուծվեն բոլոր հարցերը, որովհետև հարց է ծագելու՝ ՌԴ-ի առաքելության իմաստը ո՞րն է։ Կոնֆլիկտի կառավարման առաքելությունն է փորձում ստանձնել ՌԴ-ն այսօր»,- նշեց քաղաքագետը։
Ըստ նրա՝ այսօր աննախադեպ իրավիճակ է ստեղծված, երբ ՌԴ-ն ու ՀԱՊԿ-ն իրենք իրենց վտարում են ՀՀ-ից, և պաշտոնական Երևանը պարտավոր է անվտանգային այլընտրանքներ փնտրել ու գտնել՝ գործակցելով Արևմուտքի հետ։
Հարցազրույցն ամբողջությամբ՝ տեսանյութում։
Ռոբերտ Անանյան
