14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Հելսինկին Թուրքիայից արտահանձնումների թարմացված ցուցակ չի ստացել․ Ֆինլանդիայի ԱԳ նախարար
Քաղաքականություն
18.01.2023 | 22:09
Ֆինլանդիայի արտաքին գործերի նախարար Պեկկա Հաավիստոն հայտարարել է, որ Ֆինլանդիան չի ստացել այն անձանց թարմացված ցուցակը, որոնց արտահանձնումը պահանջում է Թուրքիան՝ ՆԱՏՕ-ին Հելսինկիի անդամակցության հայտի վավերացման դիմաց, գրում է Turkish Minute-ը։
Թուրքիայի նախագահ Ռեջեփ Թայիփ Էրդողանն օրերս Շվեդիայից և Ֆինլանդիայից պահանջել էր շուրջ 130 անձի արտահանձնել Թուրքիային, որոնց նա անվանել է «ահաբեկիչներ»։ Ցուցանիշը շատ ավելին է, քան նախկինում հաղորդված 33 կամ 42 անձը:
Թուրքիան մեղադրում է Ֆինլանդիային և Շվեդիային, որ նրանք ապահով ապաստան են ապահովել «քրդական ապօրինի խմբավորումների համար», որոնց համարում է «ահաբեկիչներ», ինչպես նաև որոշ քաղաքական այլախոհների, և ձեռնպահ է մնում ՆԱՏՕ-ին այս երկրների անդամակցության հայտերի վավերացումից՝ չնայած հունիսին Մադրիդում ձեռք բերված համաձայնությանը:
Հաավիստոն ասել է, որ Ֆինլանդիան Թուրքիայից նոր ցուցակ չի ստացել արտահանձնման հարցումների վերաբերյալ: Նա նշել է, որ Էրդողանի խոսքերը կարող են արձագանք լինել Ստոկհոլմում անցած շաբաթ քրդական խմբավորման կողմից կազմակերպված հակասական բողոքի ակցիային։
Հավելենք, որ Ստոկհոլմում ակցիայի ընթացքում ցուցարարները գլխիվայր կախել էին Էրդողանի խամաճիկը, ինչը հավելյալ լարվածություն է առաջացրել Թուրքիայի ու Շվեդիայի հարաբերություններում։
Էմմա Չոբանյան
