25.11.2024 | 15:36
ՃՏՊ Աշտարակ-Ապարան ավտոճանապարհին. կան տուժածներ
Ալիևը շնորհակալություն է հայտնել ԱՄԷ ղեկավարին «ՄԱԿ-ի ԱԽ-ում աջակցության համար»
Քաղաքականություն
16.01.2023 | 13:26
Ադրբեջանի նախագահ Իլհամ Ալիևն աշխատանքային այցով Արաբական Միացյալ Էմիրություններում է։ Նախօրեին Աբու Դաբիում տեղի է ունեցել Ալիևի հանդիպումը ԱՄԷ նախագահ Շեյխ Մուհամմեդ բին Զայեդ Ալ Նահյանի հետ։
Ըստ ադրբեջանական կողմի տեղեկատվության՝ հանդիպմանն Ալիևը ասել է, որ ՄԱԿ-ի Անվտանգության խորհրդում Հարավային Կովկասի տարածաշրջանի շուրջ քննարկումների ժամանակ ԱՄԷ-ի կողմից Ադրբեջանին ցուցաբերվող աջակցությունը բարձր է գնահատվում և «բարեկամության ու եղբայրության օրինակ է»։ Խոսքը Լաչինի միջանցքի փակման վերաբերյալ ՄԱԿ-ի ԱԽ-ում քննարկման մասին է։ Ըստ պաշտոնական հաղորդագրության՝ նախագահները նշել են, որ «Ադրբեջանը և Արաբական Միացյալ Էմիրությունները խաղաղասեր պետություններ են, ընդգծել են երկու երկրների ջանքերը տարածաշրջանում խաղաղության, կայունության և անվտանգության ապահովման ուղղությամբ»։
Զրույցի ընթացքում նշվել է, որ երկու երկրները սերտորեն համագործակցում են քաղաքականության, տնտեսության, անվտանգության և այլ ոլորտներում, ընդգծվել է կապերի հետագա ընդլայնման կարևորությունը։
Հավելենք նաև, որ ադրբեջանական պետական նավթային SOCAR ընկերությունն ու էմիրությունների Masdar-ը երկու համաձայնագիր են ստորագրել Ադրբեջանում վերականգնվող էներգիայի աղբյուրների զարգացման ծրագրերի իրականացման վերաբերյալ։
Էմմա Չոբանյան
