20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Ռուսաստանն Իրանին Սու-35 կործանիչներ է մատակարարելու
Քաղաքականություն
26.12.2022 | 13:44
Ռուսաստանն առաջիկայում Իրանին կործանիչների էսկադրիլիա է մատակարարելու։ Արևմտյան հետախուզությունում Մոսկվայի և Թեհրանի միջև ռազմական գործարքներին հետևող աղբյուրներին վկայակոչելով՝ գրել է իսրայելական i24news հեռուստաալիքը, գրում է DW-ի ռուսական ծառայությունը։
Լրատվամիջոցը նշում է, որ խոսքը, ամենայն հավանականությամբ, 24 ՍՈւ-35 կործանիչների մասին է, որոնք ի սկզբանե նախատեսված էին Եգիպտոսի համար՝ խափանված գործարքի շրջանակում։ Հետախուզության տվյալներով՝ իրանցի օդաչուներն արդեն մարզվում են այդ ինքնաթիռներով։ Բացի այդ, Թեհրանը Մոսկվայից ստանալու է ՀՕՊ համակարգեր։
Իրանն իր հերթին 300 «Շահեդ-136» կամիկաձե անօդաչու թռչող սարքերի ևս մեկ խմբաքանակ կուղարկի Ռուսաստան՝ ի հավելումն արդեն առաքված 1,700 անօդաչուների:
Ավելի վաղ Ուկրաինայի ՊՆ հետախուզության գլխավոր վարչության ղեկավար Կիրիլ Բուդանովը հայտնել էր, որ Ռուսաստանի կողմից ստացված 1,700 իրանական անօդաչու թռչող սարքերից Ռուսաստանն արդեն 540 անօդաչու թռչող սարք է ուղարկել Ուկրաինայի տարածք։ Մոսկվան հերքում է, որ Ուկրաինային հարվածներ է հասցրել իրանական զենքից։ Թեհրանն էլ ընդունել է, որ Ռուսաստանին մատակարարել է անօդաչուների ոչ մեծ խմբաքանակ, սակայն ուկրաինական պատերազմից առաջ։
Այս աղբյուրների տվյալները հաստատում են իսրայելական հետախուզության՝ «Մոսադ»-ի տնօրեն Դեյվիդ Բարնեայի տեղեկությունը, նշում է i24news-ը։ Ավելի վաղ նա հայտնել էր, որ Իրանը ծրագրում է ընդլայնել Ռուսաստան ժամանակակից զենքի մատակարարումները։
Դեկտեմբերին էլ ամերիկյան NBC հեռուստաալիքը, հղում անելով Սպիտակ տան աղբյուրներին, հայտնել էր, որ Ռուսաստանն «աննախադեպ մակարդակի» ռազմական և տեխնիկական աջակցություն է ցուցաբերում Իրանին՝ Ուկրաինայի պատերազմի համար Թեհրանի կողմից զենքի մատակարարման դիմաց: NBC-ի աղբյուրները նաև խոսել էին Թեհրանին կործանիչների հնարավոր փոխանցման մասին։
Էմմա Չոբանյան
