Գերմանիայում բնական հեղուկացված գազի առաջին տերմինալը սկսել է վառելիք ստանալ

Դեկտեմբերի 21-ին Վիլհելմսհավեն նավահանգստում հեղուկացված բնական գազի (LNG) տերմինալը ձեռնարկությունների և տնային տնտեսությունների համար վառելիքի առաջին խմբաքանակն է մղել գերմանական գազի փոխանցման ցանց: Ըստ Uniper օպերատոր ընկերության՝ դա արվել է նախատեսված ժամկետից մեկ օր շուտ, գրում է DW-ի ռուսական ծառայությունը։

Տերմինալը պաշտոնապես շահագործման է հանձնվել դեկտեմբերի 17-ին։ Այդ օրը Վիլհելմսհավեն են այցելել Գերմանիայի կանցլեր Օլաֆ Շոլցը, էկոնոմիկայի նախարար Ռոբերտ Հաբեկը և ֆինանսների նախարար Քրիստիան Լինդները։ LNG տերմինալի բացման արարողության ժամանակ Շոլցն ընդգծել է, որ դրա նպատակն է Գերմանիայում էներգիայի մատակարարումն «անկախ դարձնել Ռուսաստանից եկող խողովակաշարերից»։

Դեկտեմբերի 15-ին «Höegh Esperanza» վերագազիֆիկացման նավը խարսխվել է Վիլհելմսհավենում: Այն Իսպանիայից Գերմանիա է մատակարարել 165 հազար խորանարդ մետր հեղուկացված գազ։ Հենց այս վառելիքն է այժմ սկսել մուտք գործել Գերմանիայի գազափոխադրման ցանց։ Ըստ Uniper-ի՝ գազի այս ծավալը բավարար է տարվա ընթացքում 50-ից 80 հազար տնային տնտեսությունների մատակարարման համար։

Սպասվում է, որ առաջին LNG լցանավերը կսկսեն Höegh Esperanza-ում խարսխվել և պահեստարաններ հեղուկ գազ մղել հունվարի կեսերից:

«Դեռևս չի ծրագրվում ընդունել Ռուսաստանից LNG մատակարարումներ, գազը ներկրվելու է ԱՄՆ-ից, Հյուսիսային և Արևմտյան Աֆրիկայից ու Մերձավոր Արևելքից»,- Business Insider-ին հայտնել է Uniper, RWE և VNG ընկերությունների ներկայացուցիչը։

Տաթև Ֆռանգյան