25.06.2026 | 02:11
ԱԱ-2026. Շվեյցարիան ու Կանադան դուրս եկան փլեյ-օֆֆ. ՏԵՍԱՆՅՈՒԹ
Human Rights Watch-ը` Լաչինի միջանցքի մասին․ Ադրբեջանի իշխանությունները և ռուս խաղաղապահները պետք է ապահովեն միջանցքի բաց մնալը
Քաղաքականություն
21.12.2022 | 12:53
Լեռնային Ղարաբաղը Հայաստանի հետ կապող միակ ճանապարհն արգելափակված է 2022 թվականի դեկտեմբերի 12-ից՝ խաթարելով այնտեղ բնակվող տասնյակ հազարավոր էթնիկ հայերի համար առաջին անհրաժեշտության ապրանքների և ծառայությունների հասանելիությունը, գրում է Human Rights Watch միջազգային իրավապաշտպան կազմակերպությունը։
Փակված ճանապարհը թույլ չի տալիս նաև Լեռնային Ղարաբաղի բնակիչներին տեղաշարժվել։ Հաղորդվում է, որ ավելի քան հազար մարդ արգելափակված է միջանցքի այս կամ այն կողմում, և մարդիկ չեն կարողանում հասնել իրենց տները: Նրանց թվում կան տասնյակ երեխաներ, ովքեր դպրոցական ճամփորդությամբ մեկնել էին Հայաստանի մայրաքաղաք Երևան, և այժմ նրանց արգելված է վերադառնալ իրենց տներ ու ծնողների մոտ։
«Լեռնային Ղարաբաղն արտաքին աշխարհին կապող միակ ճանապարհի երկարատև արգելափակումը կարող է հանգեցնել մարդասիրական սարսափելի հետևանքների»,- հայտարարել է Human Rights Watch-ի Եվրոպայի և Կենտրոնական Ասիայի տնօրեն Հյու Ուիլյամսոնը:
Նշվում է, որ ըստ Արցախի մարդու իրավունքների պաշտպան Գեղամ Ստեփանյանի՝ շրջանը Հայաստանից օրական ներկրում է մոտ 400 տոննա առաջին անհրաժեշտության ապրանքներ, այդ թվում՝ սննդամթերք, հիգիենայի պարագաներ, դեղորայք, կենցաղային և այլ իրեր, որոնք կենսական նշանակություն ունեն քաղաքացիական բնակչության հումանիտար կարիքների համար։ Ճանապարհն օգտագործվում է նաև վառելիքի, դիզվառելիքի և բենզինի ներկրման համար։
«Անկախ նրանից, թե ով է փակել ճանապարհը, Ադրբեջանի իշխանություններն ու այնտեղ տեղակայված ռուսական խաղաղապահ ուժերը պետք է ապահովեն, որ մուտքը բաց մնա՝ ապահովելու ազատ տեղաշարժը և մարդկանց հասանելիությունը հիմնական ապրանքներին և ծառայություններին։ Որքան երկար լինի հիմնական ապրանքների և ծառայությունների մատակարարման խափանումը, այնքան ավելի մեծ է վտանգը քաղաքացիական անձանց համար»,- ասել է Հյու Ուիլյամսոնը։
Տաթև Ֆռանգյան
