30.10.2026 | 11:18
Հարկադիրի Շիրակի բաժնի պետը կալանավորվել է
Շվեդիայի Գերագույն դատարանը դադարեցրել է Էրդողանի պահանջով թուրք լրագրողի արտահանձնման գործընթացը
Քաղաքականություն
19.12.2022 | 20:50
Շվեդիայի Գերագույն դատարանն այսօր արգելափակել է վտարանդի թուրք լրագրող Բյուլենթ Քենեշի արտահանձնման գործընթացը, որն Անկարայի հիմնական պահանջն է՝ ՆԱՏՕ-ին Շվեդիայի անդամակցության հայտը վավերացնելու համար։ Այս մասին գրում է Agence France-Presse-ը, որին վկայակոչում է Turkish Minute-ը։
Դատարանը նշում է, որ «մի քանի խոչընդոտներ» կային անգլալեզու Today’s Zaman օրաթերթի նախկին գլխավոր խմբագիր Բյուլենթ Քենեշին հետ ուղարկելու համար, ում Թուրքիան մեղադրում է 2016 թվականին նախագահ Ռեջեփ Թայիփ Էրդողանին տապալելու փորձին մասնակցելու մեջ։ Ըստ դատարանի՝ Քենեշին ուղղված մեղադրանքներից մի քանիսը Շվեդիայում հանցագործություններ չեն համարվում, ինչը գործի քաղաքական բնույթի և Շվեդիայում նրա փախստականի կարգավիճակի հետ մեկտեղ՝ անհնար է դարձրել արտահանձնումը։
«Կա նաև հետապնդման վտանգ՝ հիմնված այս անձի քաղաքական համոզմունքների վրա։ Հետևաբար, արտահանձնում չի կարող տեղի ունենալ»,- ասվում է դատավոր Փեթեր Ասփի հայտարարության մեջ։
Արդյունքում, շվեդական կառավարությունը չի կարող բավարարել Անկարայի արտահանձնման պահանջը։
Քենեշն ասել է, որ «ուրախ է որոշման կապակցությամբ» և ընդգծել, որ իր դեմ ուղղված մեղադրանքները «հորինված են Էրդողանի ռեժիմի կողմից»։
Հավելենք, որ ՆԱՏՕ-ին Շվեդիայի անդամակցության հայտը վավերացնելու դիմաց Թուրքիան պահանջում է արտահանձնել տասնյակ քրդերի ու թուրքերի, որոնց «ահաբեկիչներ» է որակում։
Էմմա Չոբանյան
