13.09.2026 | 20:00
Ո՞վ կարող է տուն առնել Երևանում․ անշարժ գույքի շուկայի «անհասանելի» ՇԵՐՏԵՐԸ․ ՏԵՍԱՆՅՈՒԹ
Հայաստանում Չեխիայի դեսպանը հայտարարել է, որ ՌԴ-ն է պատախանատու Լաչինի միջանցքում փոխադրումների համար
Քաղաքականություն
19.12.2022 | 13:17
ՀՀ-ում Չեխիայի նորանշանակ դեսպան Պետր Պիրունչիկը «Ազատություն» ռադիոկայանի հետ հարցազրույցում հայտարարել է, թե այն, ինչ հիմա կարող է անել Եվրամիությունը Լաչինի միջանցքի հարցում, համոզվելն է, որ մարդասիրական իրավիճակը տանելի է։
Նա նշել է, որ 2020 թվականի նոյեմբերին ստորագրված եռակողմ հայտարարության համաձայն՝ Ռուսաստանն է պատասխանատու այդ տարածքում փոխադրումների համար՝ հավելելով, որ հիմնական կողմը, որից պետք է հարցնել, թե ի՞նչ է կատարվում, ի՞նչ է լինելու հետո և ի՞նչ եք անելու, Ռուսաստանն է։
«Նրանք պայմանավորվել են, որ իրենք կապահովեն, որ այդ տարածքում միջանցքը բաց է լինելու և կպահպանվի խաղաղությունը», – ասել է Պիրունչիկը։
Դեսպանը շեշտել է, որ տեղյակ է, թե ինչ է կատարվում Լաչինի միջանցքում՝ հավելելով՝ «կծիծաղեր Ադրբեջանի պաշտոնական բացատրության վրա, թե դիվանագետ չլիներ»։
«Իհարկե՝ մի քիչ հիմար տեսք ունի, նկատի ունեմ՝ պաշտոնական բացատրությունը, որ դրանք բնապահպան ակտիվիստներ են և պատահաբար ձմռան սկզբին, երբ ձյուն է գալիս, երբ ցուրտ է․․․ եթե ես դիվանագետ չլինեի, կասեի՝ եկեք ծիծաղենք այս բացատրության վրա։ Մենք, իհարկե, չենք կարող ծիծաղել ստեղծված իրավիճակի վրա, քանի որ այն իսկապես 120 հազար մարդու ցրտի մեջ է թողնում, նրանք չունեն տարրական բժշկական կարիքներ հոգալու միջոցներ, ունեն մարդասիրական օգնության կարիք։ Դուք հարցրեցիք, թե ի՞նչ անել դրա դեմ, ի՞նչ է անում Չեխիան կամ ի՞նչ կարող է անել Եվրամիությունը։ Ինչպես գիտեք՝ Չեխիան Եվրամիության անդամ է, այսպիսով մենք աջակցում ենք Եվրամիության համատեղ գործունեությանը», – ասել է դեսպանը։
Չեխ դիվանագետը շեշտել է, որ միակ կենսունակ լուծման կամ երկարաժամկետ կայուն խաղաղության պայմանագրի պետք է հասնել միայն հայերի և ադրբեջանցիների միջև ուղիղ բանակցությունների արդյունքում։
Հիշեցնենք, որ արդեն ութերորդ օրն է Բաքուն փակ է պահում Արցախը Հայաստանին ու աշխարհին կապող միակ ճանապարհը՝ Լաչինի միջանցքը՝ ստեղծելով հումանիտար աղետ։
Էմմա Չոբանյան
