09.10.2026 | 15:35
Երևանում սպասվում են կարճատև անձրևներ
ԵԽ-ն Սաակաշվիլիին ազատ արձակելու և Իվանիշվիլիի նկատմամբ պատժամիջոցներ կիրառելու մասին բանաձև է ընդունել
Քաղաքականություն
14.12.2022 | 22:00
Եվրախորհրդարանը (ԵԽ) 430 կողմ, 52 դեմ ձայների հարաբերակցությամբ ընդունել է Վրաստան-ԵՄ ասոցացման համաձայնագրի կատարման մասին բանաձևը, գրում է Aliq Media-ն։
Բանաձևում եվրապատգամավորները անհանգստություն են հայտնել Վրաստանում ժողովրդավարության հետընթացի համար, կառավարությանը կոչ են արել ազատ արձակել Վրաստանի երրորդ նախագահ, այժմ անազատության մեջ գտնվող Միխեիլ Սաակաշվիլիին։
Բացի այդ, ԵԽ-ին կոչ են արել պատժամիջոցներ սահմանել Վրաստանի նախկին վարչապետ Բիձինա Իվանիշվիլիի նկատմամբ, ով բանաձևում առաջին անգամ հիշատակվում է ոչ թե որպես նախկին վարչապետ, այլ՝ օլիգարխ։
Բանաձևի մեկ այլ հասցեատեր է Վրաստանի նախագահ Սալոմե Զուրաբիշվիլին. նրան խնդրում են օգտագործել սահմանադրությամբ տրված լիազորությունները՝ ներում շնորհելու Սաակաշվիլիին և ընդդիմադիր «Մթավարի արխի»-ի գլխավոր տնօրեն Նիկա Գվարամիային։
Բանաձևում Վրաստանի իշխանություններին ևս մեկ անգամ հիշեցրել են, որ միայն ԵԽ-ի 12 առաջնահերթությունները կատարելուց հետո երկիրը կկարողանա ստանալ Եվրամիության թեկնածուի կարգավիճակ։
Նշենք, որ Եվրոպական խորհուրդը հունիսի 23-ին Բրյուսելում կայացած ԵՄ առաջնորդների գագաթնաժողովում որոշում է կայացրել Վրաստանի, Ուկրաինայի և Մոլդովայի թեկնածուի կարգավիճակի մասին։
Այս որոշմամբ՝ Ուկրաինային և Մոլդովային կտրվի թեկնածու երկրի կարգավիճակ, Վրաստանին կտրվի եվրոպական հեռանկար և պայմաններ՝ թեկնածուի կարգավիճակ ստանալու համար։
