Լաչինի միջանցքում տեղի ունեցողը ռազմական ակտին հավասարազոր բան է․ Աղազարյանն առաջարկում է ոչ թե ՌԴ-ին կոչ անել, այլ պահանջել․ ՏԵՍԱՆՅՈՒԹ

ԱԺ արտահերթ նիստում քննարկվում է ԱԺ «Քաղաքացիական պայմանագիր» խմբակցության ներկայացրած «Ադրբեջանի կողմից Լեռնային Ղարաբաղում հումանիտար ճգնաժամ հարուցելու մասին» ԱԺ հայտարարության նախագիծը:

«Քաղաքացիական պայմանագիր» խմբակցության ատգամավորներ Վիգեն Խաչատրյանը, Արսեն Թորոսյանը և Հովիկ Աղազարյանն առաջարկեցին նախագծով Ռուսաստանի Դաշնությանը ոչ թե կոչով դիմել, այլ պահանջել իրականացնել գործողություններ` ապահովելու եռակողմ հայտարարությամբ ամրագրված դրույթների լիակատար իրացումը ռուս խաղաղապահների վերահսկողության գոտում:

«Առաջարկում եմ ոչ թե կոչ անել, այլ պահանջել Ռուսաստանից կատարել իր պարտականություննեը։ Մենք իրավունք ունենք պահանջելու։
Այն, ինչ այսօր տեղի է ունենում Լաչինի միջանցքում, դա ռազմական ակտին հավասարազոր բան է։ Երբ որ պատերազմներ են լինում, այնպես չէ, որ առավոտից երեկո թնդանոթները կրակում են։ Շրջափակումը պատերազմի ամենասարսափելի ակտերից մեկն է։ Հետևաբար ՌԴ-ից պետք է պահանջել»,- նշեց Հովիկ Աղազարյանը և դիմելով «Քաղաքացիական պայմանագիր» խմբակցության ղեկավար Հայկ Կոնջորյանին, ով ներկայացնում էր նախագիծը, հետաքրքրվեց՝ Ռուսաստանն ինչ-որ խնդիրնե՞ր ունի, դժվարանո՞ւմ է։

Այս համատեքստում Հայկ Կոնջորյանը կարծիք հայտնեց, որ Ադրբեջանը նպատակաուղղված իրականացնում է ռուսական խաղաղապահ զորախմբի և ռուսական խաղաղապահների արժեզրկման և հեղինակազրկման գործողություն:
Ըստ Կոնջորյանի` Լաչինի միջանցքում ռուս խաղաղապահ զորախմբի գործունեության ժամկետի երկարացման վերաբերյալ քննարկումները պետք է առարկայանան:

«Մեր մոտեցումն այն է, որ ԼՂ հարցի հանգուցալուծման ճանապարհը Ստեփանակերտի և Բաքվի միջև ուղիղ երկխոսությունն է: Մենք ջանքեր ենք գործադրում, որպեսզի ստեղծվեն այնպիսի միջազգային մեխանիզմներ, որոնք հնարավորություն կտան այդ երկխոսությունը ծավալելու:

Այս հայտարարության նախագծում ևս այդ մասին նշել ենք»,- նշեց խմբակցության ղեկավարը և հավելեց, որ խորհրդարանի կողմից հստակ և պաշտոնական դիվանագիտության հետ ներդաշնակված ուղերձները շատ կարևոր են լինելու, որ միջազգային հանրությունը հասկանա ու ճիշտ գնահատական տա, ճիշտ գործողություններ կատարի ստեղծված իրավիճակի հանգուցալուծման համար:

Մանրամասները՝ տեսանյութում։