ԵՄ-ն ցանկանում է Ռուսաստանին դուրս մղել Հարավային Կովկասից. Զախարովան՝ ՀՀ-ում ԵՄ առաքելության մասին

ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում մեկնաբանել է Հայաստանում ԵՄ դիտորդական առաքելության երկարաձգման մասին հարցը՝ հայտարարելո, որ Հարավային Կովկասում իր գործունեության մեջ ԵՄ-ն առաջնորդվում է բացառապես պատեհապաշտական շահերով։

«Մենք գիտակցում ենք, որ Բրյուսելը ցանկանում է ցանկացած միջոցներով ներթափանցել Երևանի և Բաքվի հարաբերությունների կարգավորման գործընթաց՝ պարզապես տեղում իրենց ներկայությունը հաստատելու և, ի վերջո, Ռուսաստանին տարածաշրջանից դուրս մղելու համար: Սա նրանց երազանքն է: Մենք բարձրաձայնել են մեր վերաբերմունքը այդ հարցով»,- նշել է Զախարովան։

Այնուամենայնիվ, քանի դեռ դիտորդական առաքելության երկարաձգման հարցը չի լուծվել, ռուսական կողմը կսպասի իրադարձությունների զարգացմանը, մանավանդ, որ տարածաշրջանի երկրներում տրամագծորեն հակառակ տեսակետներ կան Կովկասում արտատարածաշրջանային գործոնի ուժեղացման վերաբերյալ, հավելել է նա։

«Համենայնդեպս, Ռուսաստանը մշտապես կապի մեջ է Հայաստանի և Ադրբեջանի հետ այս հարցում։ Երբ որոշում կայացվի երկարաձգել ԵՄ մանդատը, Մոսկվան լրացուցիչ կմեկնաբանի դա»,- հավելել է Զախարովան։

Հիշեցնենք, որ հոկտեմբերի 17-ին Լյուքսեմբուրգում կայացած հանդիպմանը ԵՄ ԱԳ նախարարները պաշտոնապես հաստատել են Ադրբեջանի հետ Հայաստանի սահման 40 դիտորդների ուղարկելու հարցը։ Դիտորդներն իրենց աշխատանքը սկսել են հոկտեմբերի 20-ին: Առաքելությունը նախատեսված էր երկու ամսով։

Ավելի վաղ Հայաստանի արտգործնախարար Արարատ Միրզոյանը հայտարարել էր, որ Երևանը պաշտպանում է առաքելության երկարաձգման գաղափարը։

Տաթև Ֆռանգյան