«Հասարակության մեջ սոցիալական արդարությունը կարևոր է, ոչինչ այնքան չի կեղեքում մարդուն, որքան անարդարությունը։ ԱԺ քառօրյա նիստում Հայաստանում եկամուտների համընդհանուր հայտարարագրման համակարգի ներդրման վերաբերյալ նախագծի քննարկման ժամանակ այս մասին նշեց «Քաղաքացիական պայմանագիր» խմբակցության պատգամավոր Հովիկ Աղազարյանը։
«Հիմա, եթե վերցնենք Չերչիլին, ով որպես քաղաքացի, բիզնեսմեն՝ մտածում էր ձևեր, մեթոդներ, օրենքի բացերը նայելով, որպեսզի չհայտարարագրի կամ քիչ հայտարարագրի իր դասախոսություններից ստացած գումարը։ Բայց որպես պետական գործիչ՝ գտնում էր, որ դա ճիշտ չէ, և աշխատում էր այդ բացերը լրացնել։
Հիմա, եթե որևէ բիզնեսմեն իր շնորհքով մեծահարուստ է, Աստված տա, ավելի հարստանա, բայց դա միայն իրենով չէ։ Եթե ինքը գարեջուր է արտադրում և դրա արդյունքում հարստանում է, ապա եթե ես այդ գարեջուրը չխմեմ, ինքը չի հարստանա։ Հետևաբար, ինքը պետք է շահագրգռված լինի, որպեսզի գարեջուր խմողների թիվը շատանա․ ոչ թե շատ գարեջուր խմեն, այլ նրանց թիվը շատանա, որպեսզի երկրից արտագաղթ չլինի»,- նշեց Հովիկ Աղազարյանը՝ հավելելով՝ բիզնեսմեններից շատերն աշխատում են խուսափել հարկերից կամ քիչ վճարել․ ամբողջ աշխարհում դա նորություն չէ։
Անդրադառնալով քննարկվող նախագծին, Աղազարյանը նշեց, որ եթե երիտասարդներն այսօր եկամուտները չհայտարարագրեն, ապա հետագայում, երբ դառնան պաշտոնյա, հարց կառաջանա, թե իրենց գույքը որտեղի՞ց։
«Առաջինից երկրորդ ընթերցման ընթացքում փորձենք համոզել կառավարության մեր գործընկերներին, որ գույքի հայտարարագրման տարբերակն ընդունվի»։
Մանրամասները՝ տեսանյութում։
