27.07.2026 | 11:45
Լիազորությունները դադարեցված դատավորը վերականգնել է փաստաբանի արտոնագիրը
ԱԺ-ն քննարկում է ԲԴԽ անդամի ընտրության հարցը․ ՔՊ-ն առաջադրել է ՔԿ նախկին ղեկավարի թեկնածությունը․ ՏԵՍԱՆՅՈՒԹ
Քաղաքականություն
06.12.2022 | 10:45
Ազգային ժողովը քննարկում է Բարձրագույն դատական խորհրդի անդամի ընտրության հարցը: «Քաղաքացիական պայմանագիր» խմբակցությունը ԲԴԽ անդամի պաշտոնում առաջադրել է Հայկ Գրիգորյանի թեկնածությունը:
«Ինձ համար այն չափազանց մեծ պատասխանատվութուն է, իսկ խորհրդարանական կառավարման ձևի պայմաններում որպես գիտնական անդամի թեկնածու առաջադրվելը` կրկնակի պարտավորեցնող», – իր ելույթում նշեց Գրիգորյանը:
ԲԴԽ անդամի թեկնածուն ընդգծեց, որ պետք է բացառվեն օրենքի ոչ միատեսակ կիրառումը, դատական ակտերի անկանխատեսելիութունը, չպատճառաբանված դատական ակտերը, կամայականությունները, խտրականությունները, բացահայտ ապօրինությունները:
«Միևնույն ժամանակ, դա ամենևին չի նշանակում, որ դատավորը պետք է կաշկանդված լինի կամ կարող է կարգապահական պատասխանատվության ենթարկվել օրենքի ազատ մեկնաբանությունների, փաստերին ու ապացույցներին անձնական գնահատական տալու, այսինքն` գործի փաստական հանգամանքները ներքին համոզմամբ գնահատելու համար», – ընդգծեց Հայկ Գրիգորյանը:
ԲԴԽ անդամի թեկնածուն նշեց նաև, որ կենսական անհրաժեշտութուն է առաջանում ապահովել ԲԴԽ անդամի լիազորությունները, որպեսզի վերջինս, իր արդար քվեարկության միջոցով անաչառ ու վճռականորեն իրականացնելով իր լիազորությունները, բարձրացնի քաղաքացիների վստահությունը դատական իշխանության նկատմամբ:
«Ուզում եմ հավաստիացնել, որ ձեր վստահության քվեն ստանալու և ԲԴԽ անդամ ընտրվելու դեպքում պարտավորվում եմ պարտականություններս իրականացնել բացառապես օրինականության և իրավունքի գերակայության սկզբունքների հիման վրա»,- նշեց Գրիգորյանը:
Հավելենք, որ Հայկ Գրիգորյանը 2018-21 թթ. հանդիսացել է ՀՀ ՔԿ նախագահ:
Մանրամասները՝ տեսանյութում։
