07.06.2026 | 11:24
Էհ, հանուն Հայաստանի Հանրապետության. Միքայել արքեպիսկոպոս Աջապահյանը քվեարկեց․ ՏԵՍԱՆՅՈՒԹ
2 միլիոն դրամ Գյումրիի բյուջեից՝ Վլադիմիր Սպիվակովի համերգի տոմսերի համար
Մշակույթ
28.11.2022 | 21:55
Գյումրիի Վարդան Աճեմյանի անվան պետական դրամատիկական թատրոնի դահլիճում վաղը տեղի կունենա աշխարհահռչակ ռուս դիրիժոր Վլադիմիր Սպիվակովի համերգը՝ իր ղեկավարած Ռուսաստանի Դաշնության ազգային ֆիլհարմոնիկ նվագախմբի հետ։
Կազմակերպիչներից «Արվեստ 23» ՀԿ տնօրեն Աննա Տեր-Հովակիմյանը դիմել էր Գյումրու համայնքապետ Վարդգես Սամսոնյանին՝ խնդրելով որոշակի քանակությամբ տոմսեր ձեռք բերել ու օգնել համերգի կազմակերպմանը։
Այսօր Գյումրու ավագանին հրավիրած արտահերթ նիստի ժամանակ որոշեց համայնքային բյուջեից 2 միլիոն դրամ հատկացնել՝ 200 տոմս գնելու համար։
Գյումրու համայնքապետի ֆինանսական գծով խորհրդական Լենա Ջիլավյանը զեկուցեց, որ համայնքային բյուջեից գնված տոմսերը տրամադրվելու են արվեստի, երաժշտական դպրոցների բարձր առաջադիմությամբ սովորողներին և նրանց ուսուցիչներին։
Գյումրու ավագանու անդամ Արման Բաղդասարյանն էլ հորդորեց հետևողական լինել, որպեսզի տոմսերը հասնեն ճիշտ հասցեատերերերին։
Նա ընդգծեց, որ «Երևանի օրերը Գյումրիում» տոնական միջոցառման ժամանակ տոմսերի մի մասը բաժանվել էր իր համար «անհայտ մարդկանց», ընդ որում՝ նստատեղերի քանակից ավելի տոմսեր էին բաժանվել, որն էլ դժգոհության մեծ ալիք էր բարձրացրել։
Չնայած Գյումրու քաղաքապետ Վարդգես Սամսոնյանը հավաստիացրեց, որ տոմսերը կհասնեն հասցեատերերին, այդուհանդերձ ավագանու անդամը հայտարարեց, որ գրավոր կդիմի քաղաքապետարան՝ պահանջելով տեղեկատվություն այն մասին, թե մշակութային որ ՀՈԱԿ-ին քանի տոմս են հատկացրել։
Արմիկ Մովսիսյան
