09.10.2026 | 15:35
Երևանում սպասվում են կարճատև անձրևներ
Պեկինի իշխանությունները հայտարարել են քաղաքում համաճարակաբանական ծանր իրավիճակի մասին
Քաղաքականություն
21.11.2022 | 22:54
Չինաստանի մայրաքաղաքում բարդ համաճարակաբանական իրավիճակ է ստեղծվել COVID-19-ով հիվանդացության աճի ֆոնին, քաղաքում համաճարակի դեմ պայքարը գտնվում է «կրիտիկական փուլում»։ Այս մասին ասել է Պեկինի քաղաքային կառավարության խոսնակ Սյու Հեջյանը, փոխանցում է ՌԻԱ Նովոստին։
«Պեկինում նոր դեպքերի աճը մնում է բարձր։ Վարակման դեպքերի թիվը համայնքում շարունակում է աճել, իսկ համաճարակի կանխարգելման և վերահսկման աշխատանքները մայրաքաղաքում գտնվում են ամենակարևոր և առանցքային փուլում»,- հայտարարել է Սյու Հեցզյանը՝ հղում կատարելով Պեկինի COVID-19 համաճարակի կանխարգելման և վերահսկման աշխատանքային խմբի ղեկավար Յին Լինին։
Սյու Հեցզյանը նշել է, որ այս պահին առաջնայինը համաճարակի դեմ պայքարն է մայրաքաղաքի ամենախիտ բնակեցված շրջաններից մեկում՝ Չաոյանգ շրջանում։ Ըստ նրա՝ կիրակի Պեկինում հայտնաբերվել է վարակի 154 նոր տեղական դեպք, ինչպես նաև 808 ասիմպտոմ դեպք։
Պեկինում համաճարակաբանական իրավիճակը սկսել է աստիճանաբար վատթարանալ նոյեմբերի սկզբից։ Նոյեմբերի 22-ից Պեկինի իշխանությունները կխստացնեն երկրի այլ շրջաններից քաղաք մուտքի կանոնները։
Երեքշաբթի օրվանից Պեկին ժամանողներից կպահանջվի երեք օրվա ընթացքում երեք PCR թեստ հանձնել: Ներկայում Չինաստանի այլ շրջաններից մայրաքաղաք ժամանողները պետք է երկու PCR թեստ անցնեն՝ քաղաք մտնելուց հետո երեք օրվա ընթացքում։
Տաթև Ֆռանգյան
