Բացահայտե՛ք գործակալներին, մաքրե՛ք պետական համակարգերը․ գործում են ՀՀ-ի դեմ՝ մարտահրավերները լուրջ են. Լուսինե Հակոբյան․ ՏԵՍԱՆՅՈՒԹ

2014 թվականին Ուկրաինան ուներ կիսափլուզված բանակ, անվտանգային կառույցներ, դատաիրավական համակարգ, որոնք ընկղմված էին կոռուպցիայի, ոչ պրոֆեսիոնալիզմի մեջ, դրանք հագեցած էին ռուսական գործակալներով, որոնք պատերազմի թեժ պահին հօգուտ ՌԴ-ի գործեցին, արդյունքում Ուկրաինան կորցրեց Ղրիմը, Դոնեցկն ու Լուգանսկը։ Չպատժվելով՝ Պուտինի ախորժակը բացվեց։ Բայց 2022-ին՝ առաջին պատերազմից 8 տարի անց, Ուկրաինան ունի անվտանգային մարմիններ, զինուժ, դատաիրավական համակարգ, որոնք դաշնակիցների աջակցությամբ արդյունավետ պայքարում են օկուպցիայի դեմ։

ՀՀ-ում չարվեց լյուստրացիա, վեթինգ անվտանգային ուժերում և բանակում։ Ինչո՞ւ այս բարեփոխումներին չգնաց իշխանությունը։

Factor TV-ին տված հարցազրույցում «Իրավունքի Եվրոպա» ՀԿ նախագահ, իրավապաշտպան Լուսինե Հակոբյանը կարծիք հայտնեց, որ այդ արդյունքին հասնելու համար լուրջ և խորքային աշխատանք էր պետք տանել, նաև տարբերություններ կան ՀՀ-ի և Ուկրաինայի միջև․ «Իրենք այդ գործակալական ցանցերը թոթափելու կուրսը սկսել են 2014 թվականից, և այնպես չէ, որ իրենց ամբողջովին հաջողվել է դա անել։ Այնտեղ էլ այդ երևույթն արմատավորված է և հեշտ չի բացահայտվում։ Ես նոյեմբերի 9-ի չարաբաստիկ կադրերում տեսա հրապարակում փաստաբանների, որոնց ես մեր գործընկերն էի համարում, բայց իրենք հայտնի չէ՝ ինչ օրակարգով էին այդտեղ հայտնվել։ Եվ հետո էլ տեսանք, թե ում էին ներկայացնում։ Այս ամենը բացահայտելու համար խորքային կարողություններ են անհրաժեշտ»։

Իրավապաշտպանը գործակալական ցանցերի վնասաբերության աստիճանը չափազանց բարձր է համարում Հայաստանում ևս, և կոչով դիմում է իշխանությանը՝ բացահայտել դրանք, մաքրել պետական համակարգերը։

Հարցազրույցն ամբողջությամբ՝ տեսանյութում։

Ռոբերտ Անանյան