Բեռլինը հերքել է Էրդողանի հայտարարությունը․ Պուտինի հանդեպ դիրքորոշումը չի փոխվել

Նոյեմբերի 1-ին Թուրքիայի նախագահ Ռեջեփ Թայիփ Էրդողանի հետ զրույցում Գերմանիայի կանցլեր Օլաֆ Շոլցը կրկնել է իր դիրքորոշումը՝ ՌԴ նախագահ Վլադիմիր Պուտինը պետք է դադարեցնի դաժան պատերազմը, դուրս բերի ռուսական զորքերը Ուկրաինայից և խաղաղ բանակցություններ վարի Կիևի հետ։ Նման պարզաբանմամբ է հանդես եկել Գերմանիայի կառավարության պաշտոնական ներկայացուցիչը, գրում է DW-ի ռուսական ծառայությունը։

Ավելի վաղ Էրդողանը, թուրքական ATV հեռուստաալիքին տված հարցազրույցում խոսելով Շոլցի հետ իր հեռախոսազրույցի մասին, հայտարարել էր, որ Գերմանիայի կանցլերը փոխել է իր դիրքորոշումը Ռուսաստանի նկատմամբ և այժմ կարծում է, որ Ուկրաինայում պատերազմին վերջ տալու համար անհրաժեշտ է գտնել Մոսկվայի հետ «ընդհանուր հիմք»։

Ինքը՝ Շոլցը, պատերազմի սկսվելուց հետո բազմիցս կրկնել է, որ անընդունելի է համարում Ռուսաստանի հետ խաղաղ բանակցություններ վարելը՝ շրջանցելով Կիևին, և ընդգծել, որ պատերազմ սկսելու միակ պատասխանատուն Պուտինն է։

Նոյեմբերի 1-ին Գերմանիայի կառավարության ղեկավարի և Թուրքիայի նախագահի հեռախոսազրույցից հետո Գերմանիայի կառավարության մամուլի ծառայությունը հայտնել է, որ Օլաֆ Շոլցը նշել է Թուրքիայի ջանքերը՝ վերսկսելու ուկրաինական հացահատիկի արտահանումը Սևծովյան նախաձեռնության շրջանակում և կտրականապես մերժել է Մոսկվայի պնդումները, թե Ուկրաինան, իբր, պատրաստվում է «կեղտոտ ռումբ» օգտագործել։

«Գերմանիայի կանցլերը և Թուրքիայի նախագահը համաձայնել են, որ միջուկային զենքի կիրառման հնարավորության հետ կապված Ռուսաստանի հռետորաբանությունն անպատասխանատու է»,- ասվում է ուղերձում։

Տաթև Ֆռանգյան