21.04.2026 | 17:45
Ադրբեջանը չի ապահովել Լեռնային Ղարաբաղի հակամարտությունից տուժած անձանց պաշտպանությունը. Amnesty International
Շվեդիան Թուրքիային նամակ է ուղարկել կոնկրետ գործողություններով՝ կապված ՆԱՏՕ-ին Ստոկհոլմի անդամակցության հարցում Անկարայի մտահոգությունների հետ
Քաղաքականություն
21.10.2022 | 20:30
Շվեդիան «կոնկրետ գործողություններ» է ձեռնարկել՝ փարատելու ՆԱՏՕ-ին Ստոկհոլմի անդամակցության հետ կապված Թուրքիայի մտահոգությունները, այդ թվում՝ ուժեղացնելով հակաահաբեկչական ջանքերը քուրդ զինյալների դեմ։ Այս մասին ասվում է Անկարային ուղղված նամակում, որը հայտնվել է Reuters-ի տրամադրության տակ։
Երկու էջանոց նամակում ներկայացվում է Շվեդիայի կողմից արված 14 քայլերի օրինակ՝ ցույց տալու լիովին համատարմությունը հունիսին Թուրքիայի և Ֆինլանդիայի հետ ստորագրված հռչակագրին, որի շնորհիվ Անկարան հանեց ՆԱՏՕ-ին Շվեդիայի անդամակցության վետոն։
Նամակում Շվեդիան նշում է, որ «կոնկրետ գործողություններ են ձեռնարկվել եռակողմ համաձայնագրի բոլոր հիմնական տարրերի վերաբերյալ»: Շվեդիայի անվտանգության և ահաբեկչության դեմ պայքարի ոստիկանությունը՝ Սափոն, «ինտենսիվացրել է աշխատանքը PKK-ի դեմ» և սեպտեմբերին «բարձր մակարդակով այց» է կատարել Թուրքիա՝ հետախուզական գործակալության հետ հանդիպումների համար։
Շվեդիայի ԱԳՆ-ն, Թուրքիայի ԱԳՆ-ն և Էրդողանի գրասենյակի հաղորդակցության բաժինն անմիջապես չեն պատասխանել նամակը մեկնաբանելու՝ լրատվամիջոցի խնդրանքին։
Ըստ աղբյուրի՝ նամակը նպատակ ունի հանգստացնել Թուրքիային Շվեդիայի ջանքերում շարունակվող երկկողմ բանակցությունների ֆոնին և խրախուսել ՆԱՏՕ-ին անդամակցության հայտի վերջնական հաստատումը։
Նամակի համաձայն՝ Շվեդիայի իշխանությունները «նոր վերլուծություններ են իրականացրել երկրի ազգային անվտանգությանը սպառնացող վտանգների և կազմակերպված հանցավորության մեջ PKK-ի դերի վերաբերյալ և դա, ամենայն հավանականությամբ, կհանգեցնի կոնկրետ արդյունքների»։
Նշվում է նաև, որ Ստոկհոլմը օգոստոսի 31-ին Անկարայի խնդրանքով արտահանձնել է Թուրքիայի մեկ քաղաքացու՝ օգոստոսի 11-ի որոշումից հետո, և որ 2019 թվականից ի վեր, ընդհանուր առմամբ, չորս արտահանձնում է իրականացվել Թուրքիա։ Արտահանձնումները քննարկվել են հոկտեմբերի սկզբին Անկարա այցելած շվեդական պատվիրակության կողմից։
«Շվեդիան հանձնառու է լուծել ահաբեկչության մեջ կասկածվողների արտահանձնման հարցումներն արագ և մանրակրկիտ կերպով»,- ասվում է նամակում։
Հավելենք, որ ՆԱՏՕ-ին Շվեդիայի և Ֆինլանդիայի անդամակցության հայտը չեն վավերացրել միայն Թուրքիան և Հունգարիան։
Էմմա Չոբանյան
