21.04.2026 | 16:31
Դատավոր Ռոբերտ Պապոյանի վերաբերյալ կարգապահական վարույթ է հարուցվել
Անցողիկ տիկինը․ Մեծ Բրիտանիան ճանապարհում է Լիզ Թրասին․ BBC
Քաղաքականություն
20.10.2022 | 15:12
Մեծ Բրիտանիայի վարչապետ Լիզ Թրասը ընդհուպ մոտեցել է հրաժարական տալուն։ Հինգ շաբաթը նրան բավական էր՝ խորացնելու քաղաքական ու տնտեսական ճգնաժամը, որի մեջ Բրիտանիան ընկավ Եվրամիությունից դուրս գալու որոշումից հետո։ Թրասի կառավարությունը ճաքեր է տալիս, իսկ վարչապետի հրաժարականն այժմ միայն ժամանակի հարց է, որն անհրաժեշտ է՝ նրան փոխարինող գտնելու համար, գրում է BBC-ի ռուսական ծառայությունը:
Հինգ շաբաթվա ընթացքում Թրասը կորցրել է երկու գլխավոր նախարարների, խորհրդարանական խմբակցության և ընտրողների աջակցությունը։ Նրա վարկանիշը հազիվ 15 տոկոս է կազմում՝ ցածր, քան ժամանակակից պատմության մեջ Բրիտանիայի ցանկացած վարչապետ է ունեցել: Ավելին, Brexit-ի ոճով նրա բուռն բարեփոխումները չեն ստացել շուկաների ըմբռնումը՝ վտանգի տակ դնելով ֆինանսական կայունությունը, կենսաթոշակային համակարգը և, ընդհանուր առմամբ, տնտեսությունը:
Հարցականի տակ է նաև թորիների կուսակցության իշխանությունը, որը Բրիտանիայում ղեկավարում է ավելի քան 12 տարի։ Վերջին 4 տարիների ընթացքում փոխվել է 3 վարչապետ, իսկ վերջին 4 ամսում՝ 4 ֆինանսների նախարար։ Սա արդեն քաոս է, քանի որ ֆինանսների նախարարը վարչապետի աջ ձեռքն է, կառավարության կարևոր անդամը, գրում է պարբերականը։ Վերջին շաբաթների իրադարձությունները և Լիզ Թրասի գործողությունները մոլորակի յոթ ամենազարգացած երկրներից միջուկային տերությանը հասցրել են սոցիալական, քաղաքական և տնտեսական փլուզման եզրին:
Հրապարակման համաձայն՝ ամեն ինչ սկսվեց այն բանից, որ Brexit-ի գաղափարախոս Բորիս Ջոնսոնը ստերի պատճառով ստիպված եղավ հրաժարական տալ։ Նրան փոխարինելու համար կուսակցությունը (ոչ թե ժողովուրդը՝ կանոններ են այդպիսին) ընտրեց Լիզ Թրասին։
Թրասն ապահովել է Պահպանողական կուսակցության խորհրդարանական խմբակցության աջակողմյան թևի աջակցությունը, որը հանդես է գալիս կոշտ Brexit-ի, տնտեսության ամբողջական ապակարգավորման, հարկերի կրճատման և սոցիալական ծախսերի օգտին: Թրասը ներկայացրել է իր տնտեսական ծրագիրն այս ուղղությամբ՝ կրճատել հարկերը հարուստների համար, չեղարկել բիզնեսի համար նախատեսված հարկերի ավելացումը և բնակչությանը փողով աջակցել՝ ի պատասխան էլեկտրաէներգիայի և ջեռուցման թանկացման՝ կապված Վլադիմիր Պուտինի կողմից Եվրոպայի դեմ էներգետիկ պատերազմի հետ:
Թրասի արմատական ծրագիրն արժեցել է մոտ քառորդ տրիլիոն ֆունտ սթեռլինգ, բայց ո՛չ նա, ո՛չ էլ նրա ֆինանսների նախարար Քվազի Կվարթենգը չեն ասել, թե որտեղից կգան այդ գումարները: Խոստացել են այդ մասին պատմել նոյեմբերի վերջին։
Մեծ Բրիտանիայի տնտեսության մեջ անձնական և այլ մարդկանց փողերը ներդրողների շրջանում խուճապ է սկսվել։ Քառորդ տրիլիոն ֆունտ սթեռլինգի բյուջետային ճեղք ունեցող երկրի վարկատու լինելու հեռանկարը վախեցրել է ներդրողներին: Թրաս-Կվարթենգի ծրագիրը, բարգավաճման փոխարեն, երկիրը տարել է դեպի փլուզում։
Թրասը սկզբում մերժում էր բոլոր կշտամբանքները և պատասխանում երեք բառանոց կարգախոսներով․ բառացի՝ «Աճ, աճ և աճ» կամ՝ «Կանենք, կանենք, կանենք»։
Սա էլ չօգնեց, ինչի հետևանքով Թրասը ստիպված եղավ զոհաբերության գնալ, իսկ զոհ դարձավ այդ նույն ֆինանսների նախարար Կվարթենգը։ Կրկին չօգնեց։
Ե՛վ ԶԼՄ-ները, և՛ պատգամավորներն արդեն գրեթե մեկ շաբաթ է՝ Թրասին նույն հարցն են տալիս․ ինչո՞ւ եք դեռևս այստեղ, եզրափակում է հոդվածագիրը։
Տաթև Ֆռանգյան
