Քաղաքականություն
12.10.2022 | 19:11
ՌԴ-ն մտադիր է Հայաստանին և Ադրբեջանին առաջարկել ևս մեկ եռակողմ գագաթնաժողով անցկացնել, մոտ ապագայում նախատեսվում է համաձայնեցնել դրա անցկացման ժամկետները։ Այս մասին հայտնել է ՌԴ նախագահի օգնական Յուրի Ուշակովը, գրում է ՌԻԱ Նովոստին։
ՌԴ նախագահ Վլադիմիր Պուտինը հոկտեմբերի 13-14-ին այցելելու է Ղազախստան, որտեղ մասնակցելու է Ասիայում փոխգործակցության և վստահության միջոցների համաժողովին, ինչպես նաև ԱՊՀ գագաթնաժողովին։ Պուտինը հանդիպելու է Ադրբեջանի նախագահ Իլհամ Ալիևին։
«Մենք կառաջարկենք հաջորդ գագաթնաժողովն անցկացնել եռակողմ ձևաչափով՝ Ռուսաստանի, Ադրբեջանի և Հայաստանի ղեկավարների մասնակցությամբ, և հուսով ենք, որ շատ մոտ ապագայում մենք կկարողանանք պայմանավորվել դրա անցկացման ժամկետների շուրջ»,- ասել է Ուշակովը լրագրողների հետ զրույցում։
Նա նշել է, որ Ռուսաստանն ակտիվ համագործակցում է Ադրբեջանի և Հայաստանի միջև հարաբերությունների կարգավորմանը, միաժամանակ, Մոսկվան կարծում է, որ «կայուն խաղաղության հասնելու և տարածաշրջանում բոլոր խնդիրների լուծման բանալին Ռուսաստանի նախագահի ակտիվ մասնակցությամբ ձեռք բերված եռակողմ պայմանավորվածությունների իրականացումն է»։
«Մենք տեսնում ենք, որ այդ աշխատանքներին փորձում են միջամտել արտատարածաշրջանային խաղացողները, մասնավորապես, ԵՄ-ն և ԱՄՆ-ն։ Սակայն նրանք հիմնականում օգտագործում են մեր մշակումները և հիմնարար պայմանավորվածությունները, որոնք ձեռք են բերվել 2020 և 2021 թվականներին մեր ակտիվ մասնակցությամբ»,- հավելել է Ուշակովը։
Էմմա Չոբանյան
