27.02.2026 | 23:31
Ստեփանծմինդա-Լարս ավտոճանապարհը փակ է
ԵԽ-ն ուշադիր հետևելու է․ Բուրիչը դիմել է Բայրամովին Ադրբեջանի ռազմական հանցագործությունների հետաքննման համար
Քաղաքականություն
11.10.2022 | 11:55
Եվրոպայի խորհրդի գլխավոր քարտուղար Մարիա Պեյչիվոնիչ Բուրիչը հոկտեմբերի 10-ին նամակով դիմել է Ադրբեջանի ԱԳ նախարար Ջեյհուն Բայրամովին, որում անդրադարձ է կատարել Բաքվի ռազմական հանցագործություններին ու ՀՀ-ի դեմ ագրեսիային։
Մասնավորապես, նա նշել է, որ Եվրոպայի խորհրդի անդամ պետությունները տարաձայնությունները պետք է լուծեն խաղաղ կերպով բանակցությունների միջոցով։ Բուրիչը գրում է, որ Եվրոպայի խորհուրդը շարունակում է Հայաստանին ու Ադրբեջանին խրախուսել, որպեսզի բոլոր խնդիրները խաղաղ ճանապարհով ու երկխոսությամբ լուծելու քայլեր ձեռնարկեն։
«Հաշվի առնելով վերջերս ստացված տագնապալի և ցնցող հաղորդումները՝ ես պարտավոր եմ ձեր նախարարությունից պահանջել մանրամասն և ստույգ տեղեկատվություն Մարդու իրավունքների եվրոպական կոնվենցիայի 2-րդ և 3-րդ հոդվածներով նախատեսված մեղադրանքների առնչությամբ Ադրբեջանի իշխանությունների ձեռնարկած միջոցների վերաբերյալ։ Ես վկայակոչում եմ վերջին տեսանյութը, որը պատկերում է սարսափելի բռնություն հայ ռազմագերիների նկատմամբ, այդ թվում՝ արտադատական սպանությունները։ Խնդրում եմ տեղեկացված լինեք, որ Եվրոպայի խորհուրդը հարցին շատ ուշադիր է հետևելու՝ Մարդու իրավունքների եվրոպական կոնվենցիայով տրված մանդատի համաձայն, որ ապահովվի կազմակերպության չափանիշների նկատմամբ լիակատար հարգանքը»,-ասվում է նամակում։
Էմմա Չոբանյան
