Վաշինգտոնն աջակցում է Հայաստանի կողմից առաջարկված փաստահավաք առաքելության ստեղծմանը․ ԵԱՀԿ-ում ԱՄՆ դեսպան

ԵԱՀԿ-ում ԱՄՆ դեսպան Մայքլ Քարփենթերը Վիեննայում Մշտական խորհրդի նիստում անդրադարձել է Հայաստանի և Ադրբեջանի միջև վերջին զարգացումներին։

Նա նշել է, որ ԱՄՆ-ը մնում է խորապես ներգրավված՝ օգնելով Հայաստանին և Ադրբեջանին աշխատել համապարփակ խաղաղության համաձայնագրի ուղղությամբ: Ազգային անվտանգության հարցերով ԱՄՆ նախագահի խորհրդական Ջեյք Սալիվանը սեպտեմբերի 27-ին Սպիտակ տանը հանդիպել է Ադրբեջանի նախագահի խորհրդական Հիքմեթ Հաջիևի և Հայաստանի Ազգային անվտանգության խորհրդի քարտուղար Արմեն Գրիգորյանի հետ՝ խաղաղ գործընթացն առաջ մղելու նպատակով։ Հոկտեմբերի 4-ին պետքարտուղար Բլինքենը եռակողմ հեռախոսազրույց է ունեցել Հայաստանի ԱԳ նախարար Արարատ Միրզոյանի ու Ադրբեջանի ԱԳ նախարար Ջեյհուն Բայրամովի հետ, որի ընթացքում նա խրախուսել է վստահության ձևավորումը և հետագա առաջընթացը նրանց բանակցություններում։ Պետքարտուղար Բլինքենը նաև ամերիկյան կողմի  երախտագիտությունն է հայտնել Հայաստանի և Ադրբեջանի կողմից կայուն խաղաղության համաձայնագրի հասնելու ուղղությամբ ձեռնարկված դրական քայլերի համար, այդ թվում՝ Ադրբեջանից Հայաստան 17 ռազմագերիների վերադարձը։

«Մենք շարունակում ենք խրախուսել Հայաստանին և Ադրբեջանին՝ լուծելու խնդիրները բանակցությունների սեղանի շուրջ։ Անցյալ շաբաթավերջին սոցիալական ցանցերում հայտնված սարսափելի տեսանյութը, որը ցույց է տալիս, թե ինչպես են ադրբեջանական զինված ուժերը մահապատժի ենթարկում անզեն հայ գերիներին, պետք է ամբողջությամբ և անաչառ հետաքննվի: Ձերբակալվածների խոշտանգումների համար պատասխանատուները պետք է պատասխանատվության ենթարկվեն։ Մենք ի գիտություն ենք ընդունում Ադրբեջանի գլխավոր դատախազի կողմից հարուցված հետաքննությունը և հիշեցնում ենք կողմերին՝ պահպանել իրենց պարտավորությունները, արագ վերադարձնել բոլոր ռազմագերիներին և նման գերիների հետ վարվել իրենց միջազգային պարտավորություններին համապատասխան»,- ասել է ԱՄՆ դեսպանը։

Նա նշել է, որ սեպտեմբերի 13-14-ի և սեպտեմբերի 28-ի հրադադարի վերջին խախտումները խիստ մտահոգում են ԱՄՆ-ին։

«Միացյալ Նահանգները խրախուսում է Հայաստանին և Ադրբեջանին խստորեն պահպանել կայուն հրադադարը, հետ քաշել և հեռացնել իրենց Զինված ուժերը և շարունակել բանակցությունները սահմանների սահմանազատման շուրջ՝ աջակցելու խաղաղ կարգավորմանը։ Մենք վերահաստատում ենք մեր կոչը Ադրբեջանի ուժերին վերադառնալ իրենց սկզբնական դիրքերը սեպտեմբերի 12-ի գիշերը ռազմական գործողությունների բռնկումից առաջ: Սահմանային վեճերը պետք է լուծվեն բանակցությունների, ոչ թե բռնության միջոցով»,- ասել է ամերիկացի դիվանագետը։

Քարփենթերը հայտարարել է, որ ԱՄՆ-ն աջակցում է Հայաստանի առաջարկին՝ փաստահավաք խմբի ստեղծման առումով։

«Միացյալ Նահանգները վճռականորեն աջակցում է ԵԱՀԿ-ի վստահության ամրապնդման և հակամարտությունների կանխարգելման գործիքների ակտիվացմանը, ներառյալ՝ Փաստահավաք առաքելության ստեղծումը, ինչպես առաջարկվել է Հայաստանի կողմից։ Մենք կոչ ենք անում Հայաստանին և Ադրբեջանին՝ հրատապ քայլեր ձեռնարկել լարվածությունը թուլացնելու, վստահության ամրապնդման և միջազգային պարտավորությունների և պարտավորությունների հանդեպ իրենց հաշվետու լինելու համար։ Մենք խրախուսում ենք հետագա առաջընթացը անհայտ կորածների խնդրի լուծման և մնացած բոլոր ռազմագերիների վերադարձի հարցում»,- ասել է նա՝ նշելով, որ Վաշինգտոնն աջակցում է համապարփակ խաղաղության գործընթացին և հանձնառու է աշխատել երկկողմանի՝ ԵՄ-ի պես սերտ գործընկերների ու միջազգային կազմակերպությունների միջոցով, ինչպիսին է ԵԱՀԿ-ն:

Էմմա Չոբանյան