08.06.2026 | 14:37
Նիկոլ Փաշինյանին հաջողություն ենք մաղթում․ Վրաստանի խորհրդարանի նախագահ
Զելենսկին կոչ է արել ՆԱՏՕ-ին բացառել Ռուսաստանի կողմից միջուկային զենք օգտագործելու հնարավորությունը՝ կանխարգելիչ հարված հասցնելով
Քաղաքականություն
07.10.2022 | 12:54
Ուկրաինայի նախագահ Վլադիմիր Զելենսկին, հոկտեմբերի 6-ին ավստրալական վերլուծական կենտրոնում տեսակապի միջոցով ելույթ ունենալով, հայտարարել է, որ ՆԱՏՕ-ն պետք է կանխարգելիչ հարված հասցնի՝ «բացառելու Ռուսաստանի կողմից միջուկային զենք օգտագործելու հնարավորությունը», գրում է BBC-ի ռուսական ծառայությունը։
Միաժամանակ, Ուկրաինայի նախագահը չի հստակեցրել՝ նկատի ունի միջուկային հարվա՞ծ, թե՞ խոսքը սովորական սպառազինությունների կիրառման մասին է։
«Ի՞նչ պետք է անի ՆԱՏՕ-ն»,- հարցրել է Զելենսկին և ինքն էլ պատասխանել․ «Բացառել Ռուսաստանի կողմից միջուկային զենք օգտագործելու հնարավորությունը»:
«Սակայն ինչն է կարևոր, ես ևս մեկ անգամ դիմում եմ միջազգային հանրությանը, ինչպես դա եղավ փետրվարի 24-ից առաջ․ կանխարգելիչ հարվածներ, որպեսզի նրանք իմանան, թե ինչ կլինի իրենց հետ, եթե օգտագործեն։ Այլ ոչ թե հակառակը՝ սպասել Ռուսաստանի միջուկային հարվածներին»,- հավելել է Զելենսկին։
Այս հայտարարությունը շտապել է մեկնաբանել Ուկրաինայի նախագահի մամուլի քարտուղար Սերգեյ Նիկիֆորովը՝ ընդգծելով, որ Ուկրաինան միջուկային զենքի կանխարգելիչ կիրառման կոչ չի անում։
«Նախագահը խոսել է մինչև փետրվարի 24-ն ընկած ժամանակահատվածի մասին: Այնուհետև անհրաժեշտ էր կանխարգելիչ միջոցներ ձեռնարկել, որպեսզի Ռուսաստանը պատերազմ չսանձազերծի: Հիշեցնեմ, որ միջոցները, որոնք քննարկվում էին այն ժամանակ, կանխարգելիչ պատժամիջոցներն էին»,- գրել է Նիկիֆորովը:
Տաթև Ֆռանգյան
