21.04.2026 | 22:10
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
Պեսկովը հայտարարել է, թե Ռուսաստանը կվերադարձնի Ուկրաինայի այն տարածքները, որտեղից ռուսական զորքերն այսօր նահանջում են
Քաղաքականություն
05.10.2022 | 16:16
Ռուսաստանը կվերադարձնի Ուկրաինայի այն տարածքները, որտեղից ռուսական զորքերն այսօր նահանջում են։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը, գրում է BBC-ի ռուսական ծառայությունը։
«Այստեղ ոչ մի հակասություն չկա։ Նրանք ՌԴ-ի հետ կլինեն ընդմիշտ, դրանք կվերադարձվեն»,- հայտարարել է Կրեմլի խոսնակը՝ պատասխանելով Ուկրաինայի Զինված ուժերի հաջող հակահարձակմամբ պայմանավորված ռուսական զորքերի նահանջի մասին հարցին։
Ուկրաինայի Զինված ուժերի հակահարձակման հաջողությանն արձագաքնել են նաև Արևմուտքում։ NBC-ին տված հարցազրույցում ՆԱՏՕ-ի գլխավոր քարտուղար Յենս Ստոլտենբերգը շեշտել է, որ ուկրաինական ուժերը կարողանում են առաջ գնալ։
«Մենք տեսնում ենք, որ նրանք կարողացել են գրավել նոր քաղաք՝ Լիմանը, և դա ցույց է տալիս, որ ուկրաինացիներն առաջընթաց են գրանցում, կարողանում են հետ մղել ռուսական ուժերին քաջությամբ, խիզախությամբ և, իհարկե, նաև առաջադեմ զենքի շնորհիվ, որ տրամադրում են Միացյալ Նահանգները և մյուս դաշնակիցները»,- ասել է նա։
Ուկրաինական չորս շրջանների մեծ մասը բռնակցելուց հետո Մոսկվան հայտարարեց, թե այդ տարածքներն այսուհետ «Ռուսաստանի մաս են և դրանց վրա հարձակումը կնշանակի հարձակում Ռուսաստանի վրա՝ սպառնալով պաշտպանել իր տարածքը բոլոր հնարավոր միջոցներով, այդ թվում՝ միջուկային զենքով»։
Տաթև Ֆռանգյան
