Մոսկվայի դատարանը մերժել է հեռակա կալանավորել Մարինա Օվսյաննիկովային

Հոկտեմբերի 5-ին Մոսկվայի Բասմանի դատարանը հրաժարվել է հեռակա կալանավորել ռուսական «Առաջին ալիքի» նախկին խմբագիր Մարինա Օվսյաննիկովային, որը մեղադրվում է ռուսական բանակի մասին «ֆեյքեր» տարածելու համար։ Օվսյաննիկովայի փաստաբան Դմիտրի Զախվատովը «Դոժդ» հեռուստաալիքին պարզաբանել է, որ դատավորը կալանավորումից հրաժարվելը հիմնավորել է ֆորմալ հիմքով. դատախազը չի ներկայացել դատավարությանը, իսկ քննիչն ամբաստանյալին չի բերել նիստին, գրում է DW-ի ռուսական ծառայությունը։

Բասմանի դատարանի նիստից մի քանի ժամ առաջ Մարինա Օվսյաննիկովան, ում գտնվելու վայրն անհայտ է, իր Telegram ալիքում հայտարարություն է տարածել, որ չի պահպանի տնային կալանքի պայմանները։

«Ես ինձ լիովին անմեղ եմ համարում, և քանի որ մեր պետությունը հրաժարվում է կատարել իր իսկ օրենքները, 2022 թվականի սեպտեմբերի 30-ից ես հրաժարվում եմ կատարել տնային կալանքի տեսքով խափանման միջոցը և ազատվում եմ դրանից»,- գրել է նա։

Մարտի կեսերին Մարինա Օվսյաննիկովան, որն աշխատում էր որպես երեկոյան լուրերի խմբագիր «Առաջին ալիք»-ում, եթեր է դուրս եկել հակապատերազմական պաստառով։

Մինչ այդ նա տեսաուղերձ էր ձայնագրել. «Այն, ինչ հիմա կատարվում է Ուկրաինայում, հանցագործություն է։ Ռուսաստանն ագրեսոր երկիր է, և միայն մեկ մարդ է պատասխանատու այս ագրեսիայի համար։ Այդ անձը Վլադիմիր Պուտինն է»։

Հանրահավաքի անցկացման սահմանված կարգը խախտելու համար Օվսյաննիկովան դատապարտվել է 30 հազար ռուբլի տուգանքի՝ հանրահավաքից առաջ տեսագրված տեսանյութի պատճառով։

Օգոստոսի 10-ին Օվսյաննիկովային մեղադրանք է առաջադրվել «Ռուսաստանի Դաշնության զինված ուժերի օգտագործման մասին կանխամտածված կեղծ տեղեկություններ հրապարակելու համար»։ Այս հոդվածով նրան սպառնում է մինչև 10 տարվա ազատազրկում։ Օվսյաննիկովայի նկատմամբ որպես խափանման միջոց է ընտրվել տնային կալանքը՝ մինչև 2022 թվականի հոկտեմբերի 9-ը։

Հոկտեմբերի 1-ին Մարինա Օվսյաննիկովայի նախկին ամուսինը հայտարարել է, որ նա 11-ամյա դստեր հետ «թաքնվել է անհայտ ուղղությամբ»։ ՌԴ ՆԳՆ-ն Օվսյաննիկովայի նկատմամբ հետախուզում է հայտարարել։

Տաթև Ֆռանգյան