06.03.2026 | 00:13
Արարատ Միրզոյանը Ջեյհուն Բայրամովի հետ հեռախոսազրույց է ունեցել
«Լույս» հիմնադրամը աշխարհի լավագույն 10 համալսարաններում կապահովի 70 կրթաթոշակառուների աջակցությունը նաև 2018-2019 ուս. տարվա համար
Հասարակություն
29.05.2018 | 20:02
«Լույս» հիմնադրամի Հոգաբարձուների խորհուրդը որոշել է ապահովել աշխարհի լավագույն 10 համալսարաններում («Լույսի» համալսարաններ) 2017-2018 ուսումնական տարվանից իրենց կրթությունը շարունակող շուրջ 70 կրթաթոշակառուների աջակցությունը նաև 2018-2019 թթ․ ուսումնական տարվա համար։ Այդ մասին ասվում է խորհրդի այսօրվա հայտարարությունում։
«Լույս» մշակութային, գիտական, կրթական հիմնադրամի Հոգաբարձուների խորհուրդը, գոհունակությամբ փաստելով 2009-2018 թթ․ իրականացված ծրագրերի արդյունքները և կարևոր ձեռքբերումները, որոշումներ է կայացրել հիմնադրամի հետագա գործունեության վերաբերյալ։
Խորհուրդը որոշել է ապահովել աշխարհի լավագույն 10 համալսարաններում («Լույսի» համալսարաններ) 2017-2018 ուսումնական տարվանից իրենց կրթությունը շարունակող շուրջ 70 կրթաթոշակառուների աջակցությունը նաև 2018-2019 թթ․ ուսումնական տարվա համար», – ասված է հայտարարությունում։
Բարձր գնահատելով նախորդ տարիների արդյունավետ համագործակցությունը` Հոգաբարձուների խորհուրդը որոշել է դիմել Հիմնադրամի բոլոր հիմնական գործընկերներին ապագա` ներառյալ կրթական ծրագրերին նրանց աջակցության շարունակականությունը քննարկելու համար։ Այս քննարկումների արդյունքները կամփոփվեն սեպտեմբեր ամսին։
»Խորհրդի անդամներն իրենց շնորհակալական խոսքն են հայտնում հիմնադրամի կրթական ծրագրի աշխատակիցներին նախորդ տարիների նվիրված աշխատանքի համար և հուսով են, որ նրանք մասնակից ու աջակից կլինեն «Լույս» համայնքի ձևավորման և այլ գալիք նախաձեռնություններում։
Խորհրդի անդամները միակարծիք են, որ նոր գիտակրթական ու մշակութային ծրագրերին զուգահեռ «Լույս» հիմնադրամը հետագայում ևս հավատարիմ է մնալու իր առաքելությանը` աշխարհի լավագույն համալսարաններում հայազգի ուսանողների ուսումնառությանն աջակցելու հարցում` իր հիմնական նվիրատուների և դոնորների հետ շարունակական փոխգործակցությամբ և հանուն Հայաստանի Հանրապետության», – ասված է հայտարարությունում։
Նշենք, որ 2009 թվականին այն ժամանակ նախագահ Սերժ Սարգսյանի ու վարչապետ Տիգրան Սարգսյանի հիմնադրած «Լույս» հիմնադրամի գործունեության դադարեցման մասին մայիսի 10-ին հայտարարեց կառույցի կրթական ծրագրի հիմնադիր-գործադիր տնօրեն Ժաքլին Կարաասլանյանը, նշելով, թե նույն օրը «Լույսի» աշխատակազմին և իրեն ծանուցում է ներկայացվել աշխատանքի դադարեցման մասին։
Վարչապետ Նիկոլ Փաշինյանի քաղաքական թիմի անդամ, կրթության և գիտության նորանշանակ նախարար Արայիկ Հարությունյանը «Լույս» հիմնադրամի գործունեությունը դադարեցնելը «մանր սաբոտաժ էր» որակել՝ նշելով, որ դա ցույց է տալիս Սերժ Սարգսյանի գլխավորած իշխանության հակապետական բնույթը:
Շուրջ տասը տարվա գործունեության ընթացքում «Լույսի» կրթաթոշակների շնորհիվ աշխարհի տասը առաջատար բուհերում սովորել են շուրջ 570 ուսանողներ: Նախորդ տարի հիմնադրամի բյուջեն կազմել է մոտ 10 միլիոն դոլար, ընդ որում՝ կրթական դրամաշնորհների համար այդ գումարից տրամադրվել է միայն 3,5 միլիոնը, իսկ մնացյալ միջոցներն ուղղվել են Ցեղասպանության թանգարանի, Ազգային ֆիլհարմոնիկ նվագախմբի և այլ կառույցների ու ծրագրերի աջակցությանը: «Լույսի» հիմնական նվիրատուներն են եղել «Ղարաբաղ տելեկոմը», «Հայաստանի էլեկտրական ցանցերը» և «Զանգեզուրի պղնձամոլիբդենային կոմբինատը»:
