«Բաքվին ագրեսիայի մեջ մեղադրող յուրաքանչյուր ադրբեջանցի դավաճան է»․ Ադրբեջանի մեջլիսի պատգամավորների հերթական հիստերիան

Ադրբեջանի իշխանությունները շարունակում են հետապնդել բոլոր այն ադրբեջանցի գործիչներին, որոնք դեմ են հանդես եկել Հայաստանի դեմ Բաքվի վերջին ագրեսիային ու խաղաղության կոչեր են հնրեցնում։ Մասնավորապես, Միլի Մեջլիսի պատգամավոր Բահրուզ Մագերամովը նշել է, որ խաղաղությունն անհրաժեշտ է, սակայն ադրբեջանական կեղծ թեզերով նա Հայաստանին մեղադրել է «սադրանքների ու ռևաշիստական վարքագծի» համար։

Նա նշել է, որ չնայած ամենին՝ ցանկանում են «վերջնական խաղաղության շուտափույթ հաստատում և անհրաժեշտ են համարում այս գործընթացում ակտիվացնել քաղաքացիական հասարակության ինստիտուտները»։

«Սակայն վերջին օրերին տարածված խաղաղության կոչը ես համարում եմ Ադրբեջանի դեմ տեղեկատվական պատերազմի մի մաս։ Յուրաքանչյուր ադրբեջանցի, որն աջակցում է «խաղաղության կոչին»՝ մեղադրելով Ադրբեջանին ագրեսիայի մեջ, հանդիսանում է դավաճան նիհիլիստ, ռևանշիստ, որը ծառայում է հայկական շահերին, սպառնալիք է խաղաղությանն ու կայունությանը»,- հայտարարել է ադրբեջանցի պատգամավորը՝ նշելով, որ քաղաքացիական հասարակության խնդիրն է՝ ձևավորել փոխվստահության մթնոլորտ, մինչդեռ այդ մարդիկ «աններելի դավաճանություն են անում՝ ագրեսոր համարելով իրենց հողը պաշտպանող նահատակներին»։

«Եթե հիշում եք՝ պատերազմի ժամանակ ապազգային տարրերը նույն թեզով բացահայտ զրպարտում էին ադրբեջանական պետությունը, բանակն ու մեզ մեղադրում ագրեսիայի մեջ։ Այսօր էլ ընտրելով ավելի նենգ մարտավարություն խաղաղության կոչի ֆոնին՝ ադրբեջանական բանակն անվանում են զավթողական։ Կարծում եմ՝ ադրբեջանական հասարակությունն իր դիրքորոշումը պետք է արտահայտի այս հարցում»,- ասել է Մագերամովը։

Մեկ այլ պատգամավոր՝ Մեջլիսի Միջազգային հարաբերությունների և միջխորհրդարանական հարաբերությունների հանձնաժողովի անդամ Սահիբ Ալիևը նշել է, որ «նման մարդիկ ձևով են ադրբեջանցի, ոչ թե բովանդակությամբ»։

«Դրա համար  իրենց «ադրբեջանցի» կոչող տրոլները փորձում են վարկաբեկել մեր բանակի հերոսությունն ու բարձր պրոֆեսիոնալիզմը սոցցանցերում հակառակորդի սադրանքները կանխելու հարցում՝ Ադրբեջանին մեղադրելով գոյություն չունեցող ագրեսիայի մեջ։ Սակայն ինչպես նրանց դավաճանական պահվածքը Ղարաբաղյան երկրորդ պատերազմից առաջ և դրա ընթացքում արդյունք չտվեց, այնպես էլ դրանից հետո արդյունք չի տա։ Նրանց դավաճանությունն ու անպատվությունը երբեք չեն մոռացվի և չպետք է մոռացվեն»,- ասել է ադրբեջանցի պատգամավորը։

Մեջլիսի փոխնախագահ Ադիլ Ալիևն էլ հայտարարել է, թե «կան ուժեր, որոնք ցանկանում են ստվերել Ադրբեջանի հաղթանակը»։

«Ժողովրդի հացն են ուտում, դիվերսիայով են զբաղվում։ Նրանք դարձել են թշնամի պետությունների գործիք»,- ասել է Ալիևը՝ հավելելով, որ նրանք երկրի ներսում և արտերկրում «լեզուները երկարացնում են Ադրբեջանի ժողովրդի, նահատակների ու պատերազմի մասնակիցների նկատմամբ»։

Հավելենք, որ ավելի վաղ էլ Ադրբեջանի իշխող «Յենի Ադրբեջան» կուսակցության ակտիվիստները համացանցում #xainitanı («ճանաչեք դավաճաններին») հեշթեգն էին սկսել տարածել՝ ընդդիմադիրների, բլոգերների, ակտիվիստների լուսանկարներով, որոնք դեմ են արտահայտվել Ադրբեջանի նախագահ Իլհամ Ալիևի վերջին ռազմական ագրեսիային, կասկածի տակ դրել ադրբեջանական գործողությունների նպատկահարմարությունը ու դեմ են պատերազմին։

Բացի այդ, 30-օրյա ազատազրկման է դատապարտվել Demokratiya1918 (D18) շարժման նախագահ Ահմադ Մամադլին, որը սոցցանցերի իր էջում գրել էր, որ Իլհամ Ալիևը պատասխան է տալու իր բոլոր հանցագործությունների համար, որոնք կատարել է ոչ միայն ադրբեջանցի, այլև հայ ժողովրդի դեմ։

Էմմա Չոբանյան