30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Գյումրեցի «օրենքով գողերի» գործով ազատ արձակվեցին ևս երկուսը
Հասարակություն
28.09.2022 | 22:39
Այսօր Շիրակի մարզի ընդհանուր իրավասության դատարանի դատավոր Ռոման Սմբատյանի որոշմամբ ազատ են արձակվել քրեական ենթամշակույթ կրող անձանց աջակցելու համար մեղադրվող երկու ամբաստանյալներ՝ Էդմոն Գրիգորյանը և Վահան Տեր-Պողոսյանը։
Էդմոն Գրիգորյանն ազատ է արձակվել 60 միլիոն դրամ անշարժ գույքի գրավադրմամբ, Վահան Տեր-Պողոսյանը՝ 50 միլիոն դրամ գրավի դիմաց։
Այս գործով ամբաստանյալները, ընդհանուր առմամբ, 8-ն են, որոնցից 4-ն արդեն ազատ են արձակվել․ մինչ այս դատարանն ազատ էր արձակել գործով անցնող գյումրեցի ճանաչված գործարարներից մեկին՝ Ռաֆիկ Իգիթյանին՝ «Իգիթի Ռոին» և նրա որդուն՝ Աշոտ Իգիթյանին։
Գործարարը, ըստ քրգործի, օրենքով գող «Պաշի տղա Սուրո Լենինականսկիի» հավաքագրած գումարների շարժի հաշվապահությունը վարողն է եղել։ Նրան ձերբակալել էին, սակայն դատարանը նրան գրավով ազատ էր արձակել, իսկ նրա որդին ազատ էր արձակվել 60 միլիոն դրամ գրավի դիմաց։
Հիշեցնենք, որ այս քրգործի գլխավոր դերակատարը Սոչիում «օրենքով գող» «թագադրված» Սուրեն Ավետիսյանն է կամ «Պաշի տղա Սուրո Լենինականսկին»։
Ըստ քրգործի՝ Սուրեն Ավետիսյանը քրեական ենթամշակույթ կրող խմբավորում է ստեղծել և ղեկավարել։ Նա հստակ դերաբաշխում է կատարել, քրգործով անցնող անձինք էլ կատարել են նրա հանձնարարությունները։
Այս գործի շրջանակում դատարանի առաջ է նաև մեկ այլ «օրենքով գող»՝ գյումրեցի Արտյոմ Ղազարյանը՝ «Զապի եգան Արտյոմ Լենինականսկին»։
Արմիկ Մովսիսյան
