16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Դավիթ Տոնոյանը կմնա կալանքի տակ․ դատարանը մերժեց գրավով ազատ արձակելու միջնորդությունը
Հասարակություն
28.09.2022 | 21:15
«Անորակ հրթիռների» գործով արդեն մեկ տարի անազատության մեջ գտնվող պաշտպանության նախկին նախարար Դավիթ Տոնոյանի խափանման միջոց չփոխվեց։ Հակակոռուպցիոն դատարանը ժամեր առաջ որոշում է կայացրել մերժել գրավի դիմաց ազատ արձակելու մասին պաշտպանական կողմի միջնորդությունը։ Այս մասին Factor.am-ին հայտնեց Տոնոյանի պաշտպան Սերգեյ Հովհաննիսյանը.
«Որպես գրավ՝ դատարանին առաջարկվել էր պարոն Տոնոյանի միակ բնակարանը, որը գնահատվել է շուրջ 35 միլիոն դրամ։ Դատարանը, սակայն, նախորդ դատարանների նույն գործելաոճը շարունակելով՝ մերժեց մեր միջնորդությունը։ Ըստ հիմնավորման՝ նա պաշտպանության նախկին նախարար է և կարող է ազդեցություն ունենալ գործով անցնող անձանց վրա, այնինչ սա լրիվ անհիմն է»,- նշեց Հովհաննիսյանը։
Հիշեցնենք` 2021-ի սեպտեմբերի 30-ին ԱԱԾ–ն հայտնել էր, որ ՀՀ պաշտպանության նախկին նախարար Դավիթ Տոնոյանն ու զենքի մատակարարմամբ զբաղվող Դավիթ Գալստյանը ձերբակալվել են առանձնապես խոշոր չափերի հափշտակություն կատարելու կասկածանքով։
Իսկ ավելի վաղ` սեպտեմբերի 25-ին, ԱԱԾ-ն տեղեկացրել էր, որ ԶՈւ ավիացիայի նախկին պետ Ավետիք Մուրադյանն է ձերբակալվել նյութական ծանր հետևանքների առաջացմամբ իշխանությունը չարաշահելու և պաշտոնեական կեղծիքներ կատարելու կասկածանքով։
Ըստ հաղորդագրության` նա ի պաշտոնե տեղյակ է եղել, որ դեռևս 2011 թվականին զենք և ռազմամթերք մատակարարող կազմակերպություններից մեկը ՀՀ է ներմուծել 1985-1991 թվականների արտադրության հրթիռներ։ Մատակարարումից որոշ ժամանակ անց հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 2020 թվականի սեպտեմբերի 27-ին սկսված 44-օրյա պատերազմի ժամանակ:
2021թ սեպտեմբերի 30-ից Տոնոյանն ու Գալստյանը կալանավորված էին։
Դավիթ Գալստյանը, սակայն, այս տարվա մարտի 14-ին Վերաքննիչ դատարանի որոշմամբ ազատ է արձակվել։ Կիրառվել է 50 մլն դրամ գրավ։
Այս գործով մեղադրանք է առաջադրվել նաև ԳՇ պետ Արտակ Դավթյանին, ԳՇ պետի նախկին տեղակալ Ստեփան Գալստյանին, ՀՀ ՊՆ ավիացիայի վարչության ավիացիոն տեխնիկական ունեցվածքի ծառայության պետ Արտյոմ Համբարյանին և ավիացիայի վարչության գլխավոր ինժեներ Վլադիմիր Բաբայանին։
Ռոզա Վարդանյան
