20.02.2026 | 11:15
Դպրոցի նկատմամբ հարուցվել և իրականացվել է վարչական վարույթ, տնօրենի տրվել է կարգադրագիր․ ՀՀ կրթության տեսչական մարմին
Մակրոնը կոչ է անում հարգել Հայաստանի տարածքային ամբողջականությունը․ Ֆրանսիան իրավիճակը կներկայացնի ՄԱԿ-ի ԱԽ-ում
Քաղաքականություն
13.09.2022 | 14:27
Ֆրանսիան իրավիճակը կներկայացնի ՄԱԿ-ի Անվտանգության խորհրդին, որտեղ այժմ Փարիզը նախագահում է։ Ֆրանսիայի նախագահ Էմանուել Մակրոնի և Հայաստանի վարչապետ Նիկոլ Փաշինյանի հեռախոսազրույցից հետո այս մասին հայտնել են Ելիսեյան պալատից, փոխանցում է Le Figaro-ն։
Ըստ հաղորդագրության՝ նախագահ Մակրոնը «շարունակում է կոչ անել խստորեն հարգել հրադադարը և Հայաստանի տարածքային ամբողջականությունը»։
Հրապարակման համաձայն՝ Ռուսաստանը, որը «հավակնում է Կովկասում արբիտրի դերին, հայտարարել է, որ բանակցել է Գրինվիչի ժամանակով ժամը 06:00-ից գործող հրադադարի մասին համաձայնության շուրջ, որն այս փուլում չի հաստատվել ո՛չ Բաքվի, ո՛չ Երևանի կողմից»:
Հիշեցնենք՝ երեկ կեսգիշերին ադրբեջանական զինուժը լայնամասշտաբ ագրեսիա է ձեռնարկել ՀՀ սահմանների ուղղությամբ։ Իրավիճակը ժամը 14։00-ի դրությամբ որոշ ուղղություններով մնում է ծայրահեղ լարված․ հակառակորդը դիրքային առաջխաղացման փորձեր է իրականացնում 4 ուղղություններով՝ Ներքին Հանդի, Վերին Շորժայի, Արտանիշի և Սոթքի ուղղությամբ։
Թեև այսօր առավոտյան ՌԴ ԱԳՆ-ն հայտնել էր ժամը 10։00-ից հրադադարի մասին պայմանավորվածության մասին, սակայն հայկական կողմը պաշտոնապես չի հաստատել պայմանավորվածության փաստը, իսկ ՊՆ-ի վերջին հաղորդագրությունը ցույց է տալիս, որ հրադադարն առայժմ չի գործում։
Պաշտոնական տվյալներով՝ հայկական կողմն այս պահին 49 զոհ ունի։
