09.10.2026 | 15:51
Միկել Արտետան դարձել է երկրորդ ամենաբարձր վարձատրվող մարզիչն աշխարհում
Ամերիկյան B-52 ռմբակոծիչները թռել են Մերձավոր Արևելքի վրայով
Քաղաքականություն
06.09.2022 | 18:45
Ամերիկացի զինվորականները հայտնել են, որ իրենց երկու հեռահար B-52 ռմբակոծիչները՝ միջուկային մարտագլխիկներով, թռել են Մերձավոր Արևելքի վրայով՝ որպես ուժի ցուցադրություն։ Մեկ այլ նման առաքելություն տարածաշրջանում տեղի է ունեցել Վաշինգտոնի և Թեհրանի միջև շարունակվող լարվածության ֆոնին, գրում է VOA-ն:
Ռմբակոծիչներն օդ են բարձրացել Անգլիայի Ֆերֆորդում գտնվող Թագավորական ռազմաօդային ուժերի բազայից և ուսումնական առաքելությունների շրջանակում թռել են Միջերկրական ծովի արևելյան, Արաբական թերակղզու և Կարմիր ծովի վրայով՝ Քուվեյթի և Սաուդյան Արաբիայի ինքնաթիռների հետ միասին, որից հետո լքել են տարածաշրջանը:
«Միացյալ Նահանգների և մեր գործընկերների դեմ ուղղված սպառնալիքներն անպատասխան չեն մնա։ Այսպիսի առաքելությունները ցույց են տալիս ուժերը միավորելու մեր կարողությունը՝ զսպելու և, անհրաժեշտության դեպքում, հաղթելու մեր հակառակորդներին»,- ասել է Մերձավոր Արևելքում ԱՄՆ ռազմաօդային ուժերի բարձրագույն սպա գեներալ-լեյտենանտ Ալեքսուս Գրինկևիչը:
Թեև ԱՄՆ կենտրոնական հրամանատարությունը չի հիշատակել Իրանը, Վաշինգտոնը հաճախ B-52 ռմբակոծիչներ էր ուղարկում տարածաշրջան՝ ԱՄՆ-ի և Իրանի միջև շարունակվող թշնամական հարաբերությունների պայմաններում: Վերջին նման թռիչքը տեղի է ունեցել հունիսին։
Իրանի տարածաշրջանային հակառակորդ Իսրայելը միացել է բազմազգ առաքելությանը: Թեև ԱՄՆ-ը չի հայտնել այդ մասին, սակայն իսրայելական երեք F-16 կործանիչներ են ուղեկցել ամերիկյան ռմբակոծիչներին «Իսրայելի երկնքով դեպի Պարսից ծոց ճանապարհին», հայտարարել են իսրայելական զինվորականները: Միաժամանակ, նրանք ԱՄՆ-ի բանակի հետ համագործակցությունը մեծ կարևորություն են անվանել «Իսրայելում և Մերձավոր Արևելքում օդային անվտանգության պահպանման համար»։
Տաթև Ֆռանգյան
