15.09.2026 | 10:56
Գալուզինը ԵՄ-ի՝ Հայաստանին տրված խոստումները «վերացական» է անվանել
Առաջարկվում է 27 տարեկանի փոխարեն կրթական հիմքով պարտադիր զինծառայությունից տարկետում տալ մինչև 28 տարեկանը
Քաղաքականություն
05.09.2022 | 17:50
Կառավարությունը ներկայացրել է պետության համար առաջնահերթ եւ կարեւորություն ներկայացնող մասնագիտություններով համապատասխան բուհերում սովորող քաղաքացիներին պարտադիր զինվորական ծառայության զորակոչից տարկետում տալու հնարավորության սահմանմանը վերաբերող նախաձեռնություն․ տեղեկացնում են ՀՀ ԱԺ—ից։
Նախկինում տարկետման իրավունքից օգտվել են բոլորը, հետագայում այն սահմանվել է միայն լավագույն բուհերի ուսանողների համար: Այժմ Կառավարությունը փորձում է մեղմացնել այս դրույթը. տարկետման իրավունք տալ ոչ թե բոլորին, այլ որոշակի մասնագիտությունների գծով:
Գործադիրի առաջարկած լրացումներն առնչվում են «Զինվորական ծառայության եւ զինծառայողի կարգավիճակի մասին» ՀՀ օրենքին:
Առաջարկվում է օրենքի 22-րդ հոդվածը լրացնել նոր մասով, որի համաձայն՝ Կառավարության որոշմամբ պարտադիր զինվորական ծառայության զորակոչից տարկետում տրվելու է նաեւ բնագիտական, տեխնոլոգիական, ճարտարագիտական եւ մաթեմատիկական (ԲՏՃՄ) ուղղություններով պետության համար առաջնահերթ եւ կարեւորություն ներկայացնող մասնագիտություններով համապատասխան բուհերում սովորողին: Տարկետում տրամադրելու կարգը եւ պայմանները, ինչպես նաեւ համապատասխան մասնագիտությունների ցանկը սահմանելու է Կառավարությունը: Նշվում է, որ 27 տարին լրանալը զորակոչի ենթակա լինելու առավելագույն շեմ սահմանելը կրթության ոլորտում տարկետում ունեցող քաղաքացիների համար ստեղծում է մի շարք խոչընդոտներ, որոնք հնարավորություն չեն տալիս տարկետում ունեցող քաղաքացիներին ավարտել ուսումը: Նման տարիքային շեմ սահմանելու ժամանակ դպրոցական կրթությունը մեր երկրում եղել է 10-ամյա եւ քաղաքացիները, 17 տարեկանում ավարտելով դպրոցը, հնարավորություն են ունեցել մինչեւ 27 տարեկանը լրանալն ավարտել բարձրագույն կրթություն ստանալը` կրթական բոլոր աստիճաններով: Սակայն 12-ամյա կրթության անցնելուց հետո, քաղաքացիները համալսարան են ընդունվում 18 տարեկանում եւ հնարավորություն չեն ունենում ավարտել ասպիրանտական կրթությունը: Առաջարկվում է 27 տարին փոխարինել 28-ով:
Պատասխանելով պատգամավորների բազմաբնույթ հարցերին՝ ՀՀ կրթության, գիտության, մշակույթի եւ սպորտի նախարար Վահրամ Դումանյանը նշել է, որ Կառավարությունը մանրամասն պլանավորել է գործընթացը, հաշվի առել կրթական ու անվտանգային խնդիրների փոխկապակցված լինելը: Նշվել է, որ պետությունը կսահմանի որոշակի պայմաններ տարկետման իրավունք ստացածների համար:
Պատգամավորներին մտահոգել է այն հարցը, որ այս կարգավորումը կարող է ուսանողի մասնագիտության ընտրությունը պայմանավորել զուտ տարկետման իրավունք ստանալու հնարավորությամբ, եւ շատերը բանակից խուսափելու նպատակով կարող են օգտվել տարկետման իրավունքից: Վահրամ Դումանյանը վստահեցրել է, որ տարկետման իրավունքը կրթության անընդհատության ապահովմանն է միտված. բանակից ազատման խնդիր չկա: Կարծիք է հնչել, որ բուհերի մասնագիտությունների ու տնտեսության միջեւ խզում կա: Այս հարցում պատգամավոր Բաբկեն Թունյանի հետ նախարար Դումանյանը համակարծիք է եղել՝ նշելով, որ պատճառներից մեկն էլ բուհական մասնագիտությունների ցանկի բազմազանությունն է:
Հարցն արժանացել է հանձնաժողովի դրական եզրակացությանը:
