Հասարակություն
26.08.2022 | 19:495-ամյա Մանեն 4 ամիս առաջ է մահացել Ուիգմոր քլինիք ԲԿ-ում տարած բարդ վիրահատությունից հետո։ Մայրը՝ տիկին Նունեն պատմում է, որ երեխան ծնվել էր դաունի համախտանիշով, իսկ վերջին շրջանում նաև այլ խնդիր էր ի հայտ եկել․ պարանոցային 1-ին, 2-րդ ողերի ենթախախտ ուներ՝ ատամիկի կոտրվածքով։
Մանեի վիրահատությունը կազմակերպվել է ապրիլի 20-ին։ Միայն երեխայի թոշակով ապրող մորը վստահեցրել են, որ ֆինանսական խնդիրների առաջ չի կանգնի, վիրահատությունը կիրականացվի պետպատվերի և բարեգործական հիմնադրամի միջոցներով։ Այդպես էլ եղել է, սակայն, ըստ Նունեի, հետո որոշակի ֆինանսական պահանջներ են ներկայացրել դեղերի, վզի ֆիքսատորի համար, նաև տակդիրներ են ուզել, բայց հիմնական դժգոհությունը, ասում է, անուշադրությունն էր, որը կարող է երեխայի մահվան պատճառ լինել։
Վիրահատությունից 2 օր հետո երեխայի վիճակը լավ էր՝ ասում է մայրը, սակայն հետո սկսել է հրաժարվել ուտելիքից, ջերմություն ուներ։ Ըստ ծնողի՝ կապ է հաստատել վիրահատությունն իրականացրած բժիշկի հետ, ով ասել է, որ նշված խնդիրները վիրահատության հետևանքով չեն, պետք է գտնել պատճառները։
Արդեն Սուրբ Աստվածամայր բժշկական կենտրոնում պարզել են, որ երեխան ունի երկկողմանի թոքաբորբ։ Ըստ ծնողի՝ Ուիգմոր քլինիքում իրականացվել է միայն ռենտգեն հետազոտություն, որը ցույց չի տվել թոքաբորբը։ Բացի այդ, երեխայի մոտ նաև հետվիրահատական բարդություն են արձանագրել։
Երեխայի մահվան էպիկրիզի մեջ նշված են բոլոր այն բարդությունները, որոնք ի հայտ են եկել երեխայի մոտ հիվանդանոց ընդունվելու պահից մինչև մահվան օրը։ Նկարագրվում են մի շարք բարդություններ, այդ թվում՝ անգիտակից վիճակ։ Ծնողն ասում է, որ իրեն նաև խոստացել էին նոր կոնսիլիում հրավիրել՝ մահվան պատճառները հստակ պարզելու համար, դա էլ չարեցին։
Factor TV-ն փորձեց նաև պարզաբանում ստանալ Ուիգմոր քլինիքից, որտեղից ստացանք հարցերի գրավոր պատասխան։ Ներկայացնում ենք հատված այդ պատասխանից․ «Վիրահատության ստացված արդյունքը գոհացուցիչ էր։ Հետվիրահատական 3-րդ օրը գնահատվել է վիճակը միջին ծանրության, նույն գիշերը երեխայի վիճակում դիտվել է բացասական դինամիկա։ Վիրահատությունից անմիջապես հետո որոշակի ժամանակ բուժառուները գտնվում են ինտենսիվ թերապիայի բաժանմունքում, ապա նոր տեղափոխվում վիրաբուժական բաժանմունք։ Այս դեպքում ևս նման կերպ է եղել։ Երեխայի հետվիրահատական վիճակը գնահատելիս անեսթեզիոլոգիայի թիմն ունի հստակ չափորոշիչներ, համաձայն որոնց՝ որոշում է ընդունվում ինտենսիվ թերապիայի անհրաժեշտության կամ հետվիրահատական բաժին տեղափոխվելու վերաբերյալ։ Երեխայի վիճակը գնահատվել է բավարար՝ բաժին տեղափոխելու համար։ Ուիգմոր քլինիքում հետվիրահատական բաժանմունքի բոլոր հիվանդասենյակները հագեցած են անհրաժեշտ մոնիթորինգի սարքավորումներով և թթվածնային ելքերով։ Տեղափոխվելու գիշերը երեխան ունեցել է վիճակի վատացում, որը թեև ընթացքում կայունացել է, սակայն որոշում է կայացվել տեղափոխել վերակենդանացման բաժանմունք։ Մահվան դեպքը գրանցվել է Սբ. Աստվածամայր ԲԿ-ում, երեխայի հերձումը նույնպես տեղի է ունեցել նույն ԲԿ-ում և մահվան պատճառը գրանցված է երեխայի մահվան էպիկրիզում, ինչպես նաև պաթանատոմիական քննության արդյունքների նկարագրությունում»։
Մանրամասները՝ տեսանյութում։
Սաթենիկ Հայրապետյան
