04.04.2026 | 13:47
Հնդկաստանի ԱԳ նախարարը երախտագիտություն է հայտնել Արարատ Միրզոյանին՝ Իրանից իր երկրի քաղաքացիների տարհանմանն աջակցելու համար
ԱՄՆ-ն Ուկրաինայի ԶՈՒ-ին թույլատրել է բրիտանական Storm Shadows-ներով հարվածել Ռուսաստանի խորքին․ Times
Քաղաքականություն
20.11.2024 | 17:44
ԱՄՆ նախագահ Ջո Բայդենի վարչակազմը հրաժարվել է Ուկրաինայի կողմից բրիտանական «Storm Shadow» հեռահար հրթիռների կիրառման առարկություններից, գրում է The Times պարբերականը՝ հղում անելով բրիտանացի պաշտոնյաներին։ Ըստ նրանց՝ այս կապակցությամբ Մեծ Բրիտանիայի վարչապետ Քիր Սթարմերը փոխել է հանրային հռետորաբանությունն այս հարցում։
Storm Shadow-ի խոցման միջակայքը 250 կմ-ից մինչև 560 կմ է՝ կախված մոդիֆիկացիայից: Այդ հրթիռներն ուղղորդելու համար անհրաժեշտ են ամերիկյան արբանյակներից ստացված տվյալներ և քարտեզագրական հատուկ տվյալների բազա, հետևաբար, դրանց կիրառման կարգը պետք է համաձայնեցվի ԱՄՆ-ի հետ։
Նոյեմբերի 17-ին ԶԼՄ-ներում տեղեկություն հայտնվեց, որ ԱՄՆ նախագահը թույլ է տվել Ուկրաինային օգտագործել ամերիկյան ATACMS հրթիռները (հեռահարությունը՝ մինչև 300 կմ) Ռուսաստանի վրա հարձակումների համար։
Այս որոշման մասին Քիր Սթարմերին հայտնել են հրապարակումից երեք օր առաջ, գրում է The Times-ը։ Պարբերականը նշում է, որ հաշվի առնելով Սպիտակ տան կողմից հաստատման բացակայությունը՝ Մեծ Բրիտանիայի վարչապետը որոշել է ընդհանրապես չմեկնաբանել Լոնդոնի մտադրություններն այս թեմայով։
«Կան շատ լավ գործառնական պատճառներ, թե ինչու պետք է զգույշ լինենք մեր ասածներում։ Վերջին բանը, որ մենք ուզում ենք անել, Պուտինին ռազմավարական առավելություն տալն է մարտի դաշտում»,- The Times-ին ասել է անանուն աղբյուրը:
Թարգմանությունը՝ Տաթև Ֆռանգյանի
