15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Գերմանիան 880 միլիոն եվրո է հատկացնում՝ աշխարհում սովի դեմ պայքարելու համար
Քաղաքականություն
01.08.2022 | 23:19
Գերմանիայի կառավարությունը 880 միլիոն եվրո է հատկացնում՝ աշխարհում սովի դեմ պայքարելու համար։ Օգոստոսի 1-ին հրապարակված Funke Mediengruppe-ի զեկույցի համաձայն՝ Տնտեսական համագործակցության և զարգացման դաշնային նախարարությունը (BMZ) միջոցներ է ներդնում «այնտեղ, որտեղ մեծ կարիք կա, որտեղ մի քանի ճգնաժամեր համընկնում են», օրինակ՝ երաշտից տուժած երկրներում՝ Եթովպիա, Սուդան և Քենիա, գրում է DW-ի ռուսական ծառայությունը։
Այսպիսով, Գերմանիան ավելի քան կրկնապատկել է իր նախնական պարտավորությունը՝ հատկացնել 430 միլիոն եվրո՝ Ուկրաինայի դեմ Ռուսաստանի ռազմական գործողությունների հետեւանքները հաղթահարելու համար, ինչի մասին այս տարվա մարտին խոսել էր Գերմանիայի կանցլեր Օլաֆ Շոլցը։
Գերմանիան համակարգում է հատուկ միջոցների բաշխումը Բավարիայի Էլմաու քաղաքում G7-ի գագաթնաժողովից հետո։
«Գումարը գալիս է, և դա զարգացող երկրներին հնարավորություն է տալիս դառնալ ավելի անկախ»,- ասել է Գերմանիայի տնտեսական համագործակցության և զարգացման նախարար Սվենյա Շուլցեն:
Աջակցությունը պետք է հատկացվի նաև պետություններին, որոնք առանձնապես տուժել են կլիմայի փոփոխությունից ու զինված հակամարտություններից, ինչպես, օրինակ, Աֆրիկայի Սահել շրջանը և Մերձավոր Արևելքի երկրները։
Ինչպես Լիբանանը՝ նրանք մեծ ապաստան են հանդիսանում սիրիացի փախստականների համար և իրենք էլ բախվում են սննդամթերքի թանկացման խնդրին: Թունիսն ու Եգիպտոսը, որոնք մեծապես կախված են Ռուսաստանից և Ուկրաինայից հացահատիկի ներմուծումից, նույնպես օգնություն են ստանում, հայտնում է BMZ-ը:
Աղբյուրի համաձայն՝ խոսքը ինչպես բնակչության կարճաժամկետ աջակցության մասին է՝ անսպասելի վրա հասած ճգնաժամի հետևանքները մեղմելու համար, այնպես էլ երկարաժամկետ օգնության մասին՝ մատակարարումների շղթան օպտիմացնելու և գյուղատնտեսության զարգացմանն աջակցելու նպատակով։
Կարիքավոր երկրներին օգնություն բաշխելու նախագծում BMZ-ը համագործակցում է ՄԱԿ-ի մարդասիրական կազմակերպությունների և ոչ կառավարական կազմակերպությունների հետ, ինչպիսիք են գերմանական Deutsche Welthungerhilfe բարեգործական կազմակերպությունը կամ Oxfam բարեգործական ասոցիացիան:
Տաթև Ֆռանգյան
