08.06.2026 | 18:54
ՔՊ-ի կողմից ճնշումների ու խրախուսումների վերաբերյալ ահազանգեր ենք ստացել․ ԵՄ հանձնակատար․ ՏԵՍԱՆՅՈՒԹ
Ադրբեջանում Արցախի գրավյալ տարածքներում թմրանյութերի վաճառքով զբաղվող ևս 7 զինծառայողի են ձերբակալել
Քաղաքականություն
25.07.2022 | 21:01
Արցախի գրավյալ տարածքներում ադրբեջանցի զինծառայողների կողմից թմրանյութերի ապօրինի շրջանառության ու վաճառքի աղմկահարույց գործը ունի շարունակություն։ Ադրբեջանական լրատվամիջոցների փոխանցմամբ՝ գլխավոր դատախազությունը հայտնում է, որ թմրամիջոցների ապօրինի շրջանառությամբ զբաղվող հանցավոր խմբում ընդգրկված են ոչ թե չորս, այլ յոթ սահմանապահ զինծառայողներ։
Այսպիսով՝ սահմանապահ զորքերի զինծառայողներ Թուրալ Օսմանովը, Շամիլ Աբբասովը, Հաբիլ Նաջաֆովը, Քյամրան Ջաֆարովը, Նուրլան Հասիմովը, Սեյմուր Ազադխանզադեն, Իլկին Գասիմզադեն ու այլ պաշտոնատար անձինք, օգտագործելով իրենց պաշտոնական դիրքը, ստեղծել են հանցավոր խումբ Իրանից թմրանյութերի ներկրման ու քաղաքացիական անձ Հիքմեթ Հալիլիին փոխանցելու համար։
Նշվում է, որ հանցավոր խմբի անդամներն Իրանից խախտել են սահմանը մեծ քանակությամբ թմրանյութեր են տեղափոխել Արցախի գրավյալ Ջրականի շրջան։ Սահմանապահներից չորսը հուլիսի 21-ին սահմանապահ ջոկատի կողմից բերման էին ենթարկվել իրենց գողացած թմրանյութը վերցնելու փորձի ժամանակ։
Նրանցից առգրավվել է 94,3 կգ տարբեր տեսակի թմրանյութ, այդ թվում՝ մարիխուանա, հերոին, մեթադոն, մետամֆետամին և այլն։
Հետախուզում է հայտարարվել հանցավոր խմբի մեկ այլ անդամ՝ քաղաքացիական անձ Բաշիր Գուլիևի նկատմամբ։
Նշվում է, որ վերնշյալ բոլոր անձինք ձերբակալվել են, նրանց նկատմամբ հարուցվել է քրեական գործ՝ առանձնապես խոշոր չափերով թմրամիջոցների ապօրինի շրջանառության և մաքսանենգության մեղադրանքով։
Էմմա Չոբանյան
