Թուրքիայի հատուկ բանագնաց Սերդար Քըլըչն այցելել է հայ-թուրքական սահման․ԼՈՒՍԱՆԿԱՐՆԵՐ

Թուրքական Gazete Kars լրատվամիջոցը հայտնում է, որ Երևանի ու Անկարայի հարաբերությունների կարգավորման գործընթացում Թուրքիայի հատուկ ներկայացուցիչ Սերդար Քըլըչն ու նրա թիմը  այցելել են Կարս։ Քըլըչը շրջել է Անիի ավերակներում, Պանրի թանգարանում, Ռազմական պատմության թանգարանում, ինչպես նաև  եղել հայ-թուրքական սահմանի Դողուքափը անցակետում։ Հաղորդվում է, որ հանդիպումներն անցել են փակ ռեժիմով։

Ավելի վաղ   այս նույն լրատվամիջոցը հայտնել էր, որ  իսրայելական մի ընկերություն Կարսի Աքյաքա շրջանի Իբիշ գյուղի մոտ հայ-թուրքական սահմանին ականազերծման աշխատանքներ է իրականացնում։

Հավելենք, որ հուլիսի 11-ին ՀՀ վարչապետ Նիկոլ Փաշինյանը հեռախոսազրույց էր ունեցել Թուրքիայի նախագահ Ռեջեփ Թայիփ Էրդողանի հետ։ Իսկ հուլիսի 1-ին Հայաստանի և Թուրքիայի միջև հարաբերությունների կարգավորման գործընթացի հատուկ ներկայացուցիչները  չորրորդ հանդիպումն էին անցկացրել Վիեննայում։ Ըստ ՀՀ ԱԳՆ-ն՝ կողմերը պայմանավորվել էին հնարավոր ամենասեղմ ժամկետներում Հայաստան-Թուրքիա ցամաքային սահմանը հատելու հնավորություն ապահովել, համապատասխանաբար, Հայաստան և Թուրքիա այցելող երրորդ երկրների քաղաքացիների համար և որոշել սկսել այդ ուղղությամբ անհրաժեշտ գործընթացները: Պայմանավորվել էին նաև հնարավոր ամենասեղմ ժամկետներում մեկնարկել Հայաստան-Թուրքիա ուղիղ օդային բեռնափոխադրումների իրականացումը և որոշել են սկսել այդ ուղղությամբ անհրաժեշտ գործընթացները:

Էմմա Չոբանյան