14.09.2026 | 09:45
Արտարժույթների փոխարժեքները՝ սեպտեմբերի 14-ի դրությամբ
Թուրքիան ուկրաիանական հացահատիկով ռուսական նավն ազատ է արձակել․ Կիևում Թուրքիայի դեսպանը կանչվել է ԱԳՆ
Քաղաքականություն
07.07.2022 | 14:05
Նախօրեին ուշ երեկոյան ուկրաինական հացահատիկով ռուսական բեռնատար նավը դուրս է եկել Թուրքիայի Կարասու նավահանգստից։ Այս մասին հայտնել է Ուկրաինայի ԱԳՆ-ն, գրում է Unian-ը։
«Արտաքին գործերի նախարարությունը և Ուկրաինայի միջազգային գործընկերները դատապարտում են ՌԴ հանցավոր գործողությունները՝ ուկրաինական տարածքից հացահատիկ գողանալու և օտար երկրներ արտահանելու ուղղությամբ: Հատկապես աղաղակող դեպք էր ռուսական «Ժիբեկ Ժոլի» նավը, որը փորձում էր գողացված հացահատիկը Բերդյանսկից տեղափոխել թուրքական Կարասու նավահանգիստ»,- ասվում է հայտարարության մեջ։
Նշվում է, որ օպերատիվ միջամտության շնորհիվ այս նավը չի կարողացել բեռնաթափել գողացված ապրանքը և կալանավորվել է։ Թուրքական կողմին նավն ու բեռը ձերբակալելու հարցում է ուղարկվել։
«Միաժամանակ, անտեսելով ուկրաինական կողմի դիմումը, հուլիսի 6-ի երեկոյան նավն ազատ է արձակվել։ Ուկրաինական կողմը խորը հիասթափությամբ է ընդունել այդ տեղեկությունը և դիմում է թուրքական կողմին՝ հետաքննություն անցկացնել ստեղծված իրավիճակի շուրջ ու ներկայացնել սպառիչ պատասխան Ուկրաինայի իշխանության համապատասխան մարմինների դիմումներին, ինչպես նաև բոլոր միջոցներով կանխել ապագայում նման դեպքերը»,- ասվում է ԱԳՆ հայտարարության մեջ։
Տեղեկացվում է նաև, որ ստեղծված անընդունելի իրավիճակի կապակցությամբ Կիևում Թուրքիայի դեսպանը հրավիրվել է Ուկրաինայի ԱԳՆ։
Հավելենք, որ օրեր առաջ Անկարայում Ուկրաինայի դեսպանը հայտարարել էր, որ Թուրքիայում կալանվել է ուկրաինական հացահատիկով ռուսական նավ։ Թուրքական մամուլում էլ տեղեկություններ հայտնվեցին, որ հետաքննություն է իրականացվում։ ՌԴ ԱԳՆ-ն հայտարարել է, որ նավի կալանում կամ ձերբակալում չի եղել, և որ թուրքական իշխանությունները ստուգումներ են իրականացնում։
Էմմա Չոբանյան
