08.06.2026 | 11:11
Ընտրությունների ընթացքում ստացվել է 619 ահազանգ, ձերբակալվել է 18 անձ․ ՆԳՆ
ԱՄՆ-ը և Ռուսաստանն իրավունք չունեն Թուրքիային որևէ բան ասելու․ Չավուշօղուն՝ Սիրիայում նոր ռազմական գործողության մասին
Քաղաքականություն
04.07.2022 | 15:57
Թուրքիայի ԱԳ նախարար Մևլութ Չավուշօղլուն թուրքական NTV հեռուստաալիքին տված հարցազրույցում անդրադարձել է Սիրիայում Անկարայի նոր ռազմական գործողության իրականացմանը, գրում են թուրքական լրատվամիջոցները։
Նա, մասնավորապես, նշել է, որ Թուրքիան ինքնուրույն է որոշում՝ ինչ անել։
«Թուրքիան ինքն է լուծում խնդիրները, որոնք գալիս են սիրիական տարածքից։ Վտանգի առկայության դեպքում մեր երկիրը չի նայելու մյուսներին, այլ վերացնելու է այն»,- ասել է Չավուշօղլուն։
Թուրք պաշտոնյան նշել է, որ Մոսկվան ու Վաշինգտոնը իրավունք չունեն Թուրքիային ասելու՝ ինչ անել։
«Մենք բազմիցս հայտնել ենք մեր մտահոգությունը YPG-ին ԱՄՆ-ի օգնության մասով։ Ինչ վերաբերում է ազգային անվտանգությանը, ապա կապ չունի, թե ով ինչ է ասում։ Թուրքիան անում է այն, ինչ անհրաժեշտ է միջազգային իրավունքի շրջանակում։ Ռուսաստանն ու ԱՄՆ-ն իրավունք չունեն որևէ բան ասելու։ Թող նրանք նախ իրենց խոսքը պահեն։ Հեռացրե՛ք ահաբեկիչներին այստեղից։ ԱՄՆ-ը խոստացել է մաքրել այդ տարածքները։ Նաև Ռուսաստանի ոչ բոլոր քայլերն են գոհացնում Թուրքիային։ Մեր դիրքորոշումը Սիրիայի հարցում շատ հստակ է»,- ասել է Չավուշօղլուն։
Հավելենք, որ ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր Սիրիայի հյուսիսում նոր ռազմական գործողություն իրականացնելու ծրագրերի մասին։ Օրերս էլ նա հայտնել էր, որ հարձակումը կարող է հանկարծակի տեղի ունենալ։
Հիշեցնենք, որ ԱՄՆ-ն ու ՌԴ-ն տարբեր հայտարարություններով Թուրքիային կոչ են արել զերծ մնալ Սիրիայում նոր գործողությունից։
Էմմա Չոբանյան
