Փաշինյանի զգուշացումը նախարարներին. «Չենք հանդուրժի որևէ անորակ աշխատանք»․ ՏԵՍԱՆՅՈՒԹ

«Այսօր հսկայական ծավալի աշխտանքներ են իրականացվում, ֆինանսավորում է կառավարությունը, իրականացնում է մասնավոր հատվածը, բայց կատարվածի ու չկատարվածի պատասխանատվությունը մնում է կառավարության վրա, ընդհուպ մինչև ժամկետները»,- այս մասին այսօր կառավարության նիստում նշեց ՀՀ վարչապետ Նիկոլ Փաշինյանը՝ ընդգծելով՝ չենք հանդուրժի որևէ անորակ աշխատանք:

«Կարծում եմ՝ պետք է  համակարգ մտածենք, ռեյտինգավորենք ընկերություններին, որովհետև շինարարի վարքագիծը կարևոր է: Ինչո՞ւ պետք է որակի խնդիր լինի որևէ աշխատանքում:

Որևէ պաշտոնյայի կաշա՞ռք են տվել, ատկա՞տ են տվել: Ի՞նչ է նշանակում, պետությունն այդքան փող դնի, ռեսուրս ծախսի, վերջում պարզվի՝ աշխատանքը որակյալ չի: Ու էդ կազմակերպությունն ասի՝ հա դե, որակյալ չէ, բա «ներողությունն», ինչի՞ համար է, փո՛ղը տվեք կանենք: Չի  կարող այդպես լինել: Մենք նաև որոշակի վարքագիծ պետք է պարտադրենք ընկերություններին: Ժամկետներ են ձգձգում, չգիտեմ՝ օբյեկտիվ սուբյեկտիվ պատճառներով: Այդ ամեն ինչը պետք է ռեյտինգավորում անցնի, որ մենք տեսնենք՝ այս ընկերության հետ կառավարությունն ուզում է գործ ունենալ, թե ոչ»,- նշեց Փաշինյանը:

Ֆինանսների նախարար Տիգրան Խաչատրյանը հայտնեց, որ գործող համակագով նախատեսված է, որ աշխատանքները չկատարելու դեպքում կազմակերպությունները հայտնվում են «սև ցուցակներում» և նրանց հետ համագործակցությունը սահմանափակվում է:

Վարչապետի խոսքով՝ այսօր Հայաստանում չկա շինարարական մի ընկերություն, որ չունի աշխատանք. «Ընդհակառակը՝ այնքան շինարարություն են վերցնում, որ չեն հասցնում անել, մենք ենք իրենց հետևից ընկնում՝ խնդրողի կարգավիճակով ասելով՝ այս աշխատանքն էլ արեք… Այս ի՞նչ ձև է: Մի հատ էլ պարզվում է անորակ են անում. այսպես՝ «ջուրտուքշի» արա, որ մյուս աշխատանքը անենք… Այդպես չի լինի»,- նշեց վարչապետը:

Մանրամասները՝ տեսանյութում: