08.06.2026 | 06:48
1299 ընտրատեղամասերում քվեարկության նախնական արդյունքները․ ԿԸՀ
Մետրոպոլիտենի կառուցումը միայն մասնավորի հաշվին դժվար թե լինի․ Երևանի քաղաքապետ․ ՏԵՍԱՆՅՈՒԹ
Քաղաքականություն
03.06.2022 | 16:37
Դեռ 2021 թվականին մրցույթ էր հայտարարվել Երևանի մետրոպոլիտենի նոր կայարանի նախագծանախահաշվային փաստաթղթերի կազմման համար։ ԱԺ մշտական հանձնաժողովների համատեղ նիստում «Հայաստանի Հանրապետության 2021թ. պետական բյուջեի կատարման մասին» տարեկան հաշվետվության քննարկման ժամանակ այս մասին նշեց Երևանի քաղաքապետ Հրաչյա Սարգսյանը:
«Նախագծման պայմանագիրը մոտ օրերս արդեն կստորագրենք և աշխատանքները կսկսենք։ Նախագծումը, ըստ պայմանագրի, մեկ տարի է տևելու և ենթադրվում է, որ հաջորդ տարի այս ժամանակահատվածում արդեն կունենանք պատրաստի նախագիծը, որը փորձաքննության կենթարկվի, որից հետո մրցույթ կհայտարարենք շինարարական աշխատանքների համար։ Այսինք՝ ստանդարտ գործընթաց է, որի շրջանակներում տեղի է ունենում ցանկացած շինարարություն»,- նշեց քաղաքապետը։
Սարգսյանի խոսքով՝ վարչապետ Նիկոլ Փաշինյանը հանձնարարական է տվել, որպեսզի համատեղ հասկանան, թե ինչ ֆինանսական միջոցներով են Երևանի մետրոպոլիտենի նոր կայարանը կառուցելու և ինչ չափաբաժնով են ներգրավվելու մասնավոր կազմակերպությունները։
«Դրա համար այն տրամաբանությունը, որ մասնավորի հաշվին ամբողջությամբ հնարավոր կլինի մետրոպոլիտենի նոր կայարանը կառուցել, կարծում եմ, դժվար կլինի, բայց մասամբ, միգուցե, կարողանանք ինչ-որ բան անել, փոխհատուցել»,- ընդգծեց Երևանի քաղաքապետը։
Մանրամասները՝ տեսանյութում:
