17.12.2025 | 10:27
NYMEX․ Ոսկու գինն աճել է 0.32%-ով և կազմել 4320.30 դոլար
ԱՄՆ-ն Ուկրաինային ռազմական նոր օգնություն կտրամադրի
Քաղաքականություն
01.06.2022 | 11:50
Ամերիկայի Միացյալ Նահանգները շուտով կհայտարարի Ուկրաինային ռազմական օգնության նոր փաթեթի տրամադրման մասին, որը կօգնի դիմակայել ռուսական ագրեսիային: Այս մասին երեքշաբթի օրը՝ մայիսի 31-ին, հայտարարել է ԱՄՆ Պետդեպարտամենտի պաշտոնական ներկայացուցիչ Նեդ Փրայսը։
«Մենք պետք է էլ ավելի ուժեղացնենք Ուկրաինայի կարողությունը՝ պաշտպանվելու Կրեմլի կոշտ ագրեսիայից, և առաջիկա օրերին ավելի շատ բան կանենք այս կապակցությամբ», – ասել է արտաքին գերատեսչության ներկայացուցիչը։
Նա մանրամասներ չի հայտնել նոր օգնության բնույթի հետ կապված։ Պետքարտուղարության խոսնակն ընդգծել է, որ ԱՄՆ նախագահի աշխատակազմն իր տրամադրության տակ ունի մոտ 40 միլիարդ դոլար, որի մեծ մասը նախատեսված է ուկրաինացի գործընկերների պաշտպանական աջակցության համար։
Նրա խոսքով՝ Ռուսաստանի լայնածավալ զինված ագրեսիայի սկզբից ի վեր ԱՄՆ-ն Ուկրաինային տրամադրել է շուրջ 3,8 միլիարդ դոլարի պաշտպանական աջակցություն, իսկ նոր փաթեթը մեծապես մեծացնում է այդ հնարավորությունները։
Պետքարտուղարության ներկայացուցիչը շեշտել է, որ ուկրաինացիները պայքարում են գերակշռություն ունեցող ուժերի դեմ, և նրանք կունենան այն ամենը, ինչն անհրաժեշտ է ռուսական ագրեսիայից արդյունավետ պաշտպանվելու համար։
Հիշեցնենք, որ ԱՄՆ նախագահ Ջո Բայդենի վարչակազմը մտադիր է Ուկրաինային տրամադրել կառավարվող հրթիռային համակարգ՝ մոտ 65 կիլոմետր հեռահարությամբ հրթիռներով։
Տաթև Ֆռանգյան
