18.12.2025 | 10:05
Հունգարիայի առաջնության առաջատարը ցանկանում է ձեռք բերել Հայաստանի հավաքականի դարպասապահին
Թուրքիան պաշտոնապես հրապարակել է Շվեդիային ուղղված պահանջները` ՆԱՏՕ-ին անդամակցելու համաձայնության դիմաց
Քաղաքականություն
24.05.2022 | 14:35
Թուրքիան պաշտոնապես հրապարակել է Շվեդիայից ուղղված պահանջները, որոնց կատարման դեպքում Անկարան կհամաձայնի ՆԱՏՕ-ին Ստոկհոլմի անդամակցությանը։
Թուրքական կողմի պահանջները հրապարակել է Թուրքիայի նախագահականին առընթեր հաղորդակցության գրասենյակը՝ նշելով, որ Անկարան կոնկրետ երաշխիքներ է ակնկալում Շվեդիայից, որն «աջակցում է ահաբեկչական կազմակերպություններին»։ Նշվում է, որ Թուրքիան 2017 թվականից պահանջում է Շվեդիայից PKK/PYD-ի և FETO-ի ահաբեկիչների արտահանձնումը, սակայն դեռևս դրական պատասխան չի ստացել։
Հայտարարության մեջ ուշադրություն է հրավիրվում այն բանի վրա, թե «ինչպես են շվեդական իշխանությունները նախարարների մակարդակով ընդունում Թուրքիայի դեմ պայքարող ահաբեկչական կազմակերպությունների անդամներին» և աջակցում նրանց գործունեությանը երկրի ներսում, ընդգծվում է «քաղաքական աջակցության դադարեցման» անհրաժեշտությունը։ Նշվում է նաև ահաբեկչության ֆինանսավորման աղբյուրի վերացման անհրաժեշտության մասին։
Հաղորդագրության մեջ խոսվում է նաև PKK/PYD-ին սպառազինության աջակցության դադարեցման կարևորության մասին։ Ըստ թուրքական կողմի՝ Շվեդիայի կառավարությունը ռազմական տեխնիկա, մասնավորապես՝ հակատանկային և անօդաչու թռչող սարքեր է տրամադրել PKK/PYD-ին։ Հայտարարության մեջ նշվում է նաև զենքի էմբարգոյի մասին, որը Շվեդիան սահմանել է Թուրքիայի դեմ 2019 թվականին Սիրիայում «Խաղաղության աղբյուր» գործողությունից հետո։
«Ակնկալում ենք, որ Շվեդիան, որն անդամակցության հայտ է ներկայացրել, սկզբունքային քայլեր կձեռնարկի և կոնկրետ երաշխիքներ կտրամադրի Թուրքիայի անվտանգության մտահոգությունների վերաբերյալ։ Թուրքիան կոնկրետ երաշխիքներ է ակնկալում Շվեդիայից, որն աջակցում է ահաբեկչական կազմակերպություններին, ՆԱՏՕ-ի հավաքական անվտանգության սկզբունքի համաձայն»,- ասվում է հայտարարության մեջ։
Փաստորեն, ընդհանուր առմամբ, թուրքական կողմի պահանջներն են Շվեդիային՝ ահաբեկչությանն աջակցության դադարեցում (խոսքը PKK-ի, FETO-ի մասին է), ահաբեկչության ֆինանսավորման դադարեցում, PKK-ին սպառազինության մատակարարման դադարեցում, Թուրքիայի դեմ զենքի էմբարգոյի վերացում, ահաբեկչության դեմ պայքարում գլոբալ համագործակցություն։
Էմմա Չոբանյան
