08.10.2026 | 12:42
2023-ի 1-օրյա պատերազմում զոհված 51 զինծառայողի արտաշիրիմման հարց կա․ կեսը՝ եղբայրական գերեզմանում․ ՏԵՍԱՆՅՈՒԹ
Բայդենն ու Մակրոնը պատրաստվում են առաջիկա 36 ժամվա ընթացքում հայտարարել Լիբանանում հրադադարի մասին
Քաղաքականություն
26.11.2024 | 13:59
ԱՄՆ-ի և Ֆրանսիայի նախագահներ Ջո Բայդենն ու Էմանուել Մակրոնը պատրաստվում են առաջիկա 36 ժամվա ընթացքում հայտարարել Լիբանանում հրադադարի մասին, որտեղ մարտերը շարունակվում են իսրայելական բանակի և լիբանանյան «Հըզբոլլահ» խմբավորման միջև։ Հղում անելով լիբանանյան չորս բարձրաստիճան պաշտոնյաների՝ այս մասին հայտնում է Reuters-ը, որին վկայակոչում է DW-ի ռուսական ծառայությունը։
Երեքշաբթի Իսրայելի նախարարների կաբինետը ծրագրում է հանդիպել՝ զինադադարի համաձայնագիրը հաստատելու համար։
Լիբանանի խորհրդարանի փոխնախագահ Էլիաս Բու Սաաբը Reuters-ին տված մեկնաբանությունում ասել է, որ Բեյրութը «լուրջ խոչընդոտներ» չի տեսնում ԱՄՆ-ի առաջարկած հրադադարի ծրագրի իրականացման համար, եթե Իսրայելի վարչապետ Բենիամին Նեթանյահուն «չփոխի միտքը»։
Նախօրեին էլ ԱՄՆ Պետքարտուղարության խոսնակ Մեթյու Միլլերը հայտարարել է, որ Վաշինգտոնը «շարունակում է աշխատել՝ փորձելու հասնել հրադադարի համաձայնության Իսրայելի ու «Հըզբոլլահի» միջև։ Նա հույս է հայտնել, որ դա կհաջողվի։ Միլլերը նշել է, որ վերջին մի քանի օրվա ընթացքում կողմերը «զգալի առաջընթաց են գրանցել համաձայնության հասնելու ուղղությամբ»։
Reuters-ը գրում է, որ կողմերի միջև հրադադարի շուրջ բանակցությունները հիմնված են ՄԱԿ-ի Անվտանգության խորհրդի 2006 թվականի 1701 բանաձևի կատարման վրա։ Ըստ այդմ՝ լիբանանյան կանոնավոր բանակը և UNIFIL-ի խաղաղապահ զորախումբը պետք է մտնեն Իսրայելի հետ սահմանակից լիբանանյան շրջան, իսկ շարժումը պետք է իր զորքերը դուրս բերի Լիտանի գետից այն կողմ, որը գտնվում է իսրայելա-լիբանանյան սահմանից 30 կիլոմետր հեռավորության վրա։
Էլիաս Բու Սաաբի խոսքով՝ համաձայնագրի նախագիծը ենթադրում է իսրայելական զորքերի դուրսբերում հարավային Լիբանանից և այնտեղ լիբանանյան բանակի տեղակայում 60 օրվա ընթացքում։ Պաշտոնյայի խոսքով՝ հրադադարի ռեժիմը վերահսկելու է հինգ երկրներից բաղկացած հատուկ ստեղծված կոմիտեն՝ ԱՄՆ-ի նախագահությամբ, որի կազմում լինելու է նաև Ֆրանսիան։
Միաժամանակ, ՄԱԿ-ում Իսրայելի դեսպան Դենի Դանոնը հայտարարել է, որ երկիրը որոշակի հանգամանքներում կպահպանի Լիբանանի հարավին հարվածելու կարողությունը։
Թարգմանությունը՝ Էմմա Չոբանյանի
