13.05.2025 | 00:24
Ուժգին քամու ժամանակ թիթեղը պոկվել և հարվածել է հղի կնոջը․ երեխան ծնվել է ճակատի շրջանում խոր վնասվածքով
Դատախազությունն ընթացք է տվել Գոռ Վարդանյանի սերիալի առնչությամբ ԿԳՄՍՆ-ի դիմումին
Հասարակություն
26.11.2024 | 13:36
ՀՀ գլխավոր դատախազությունը ստացել է Գոռ Վարդանյանի «Կայսրության թևերը» սերիալի առնչությամբ ԿԳՄՍՆ-ի ներկայացրած դիմումը և սահմանված կարգով ընթացք տվել: Այս մասին Factor.am-ին հայտնեցին Գլխավոր դատախազության հանրային կապերի բաժնից:
Հիշեցնենք՝ «Մանկավարժահոգեբանական կենտրոն» ՊՈԱԿ-ը ԿԳՄՍՆ-ի հանձնարարականով իրականացնել է «Կայսրության թևերը» սերիալի վերլուծություն ու վերջինիս վերաբերյալ ներկայացնել եզրակացություն։ Ըստ այդմ՝ սերիալի դիտումը կարող է հանգեցնել այնպիսի բացասական վարքային դրսևորումների ընդօրինակման, ինչպիսիք են անչափահասների կողմից ծխախոտի օգտագործումը, միմյանց հանդեպ անհարգալից վերաբերմունքը, բացասական վարքի տարաբնույթ դրսևորումները և այլն։ ՊՈԱԿ-ը եզրակացրել է նաև, որ նմանօրինակ ֆիլմի դիտման արդյունքում երեխան կարող է նույնականացնել իրեն գլխավոր հերոսների հետ և անգիտակցաբար սկսել կիրառել նույնատիպ վարքագիծ։ ԿԳՄՍ նախարարությունը խիստ մտահոգիչ և անընդունելի է համարում նման քրեական ենթամշակույթի տարրեր պարունակող ֆիլմում անչափահասների ներգրավվածությունն ու մասնակցությունը։ Երեկ հայտնի դարձավ, որ նախարարությունը դիմել է Գլխավոր դատախազություն։
Նշենք, որ Factor TV-ն անդրադարձել էր Գոռ Վարդանյանի «Կայսրության թևերը» սերիալին: Սերիալի դերասաններից Գագիկ Սարգսյանը, որի անչափահաս որդին նույնպես նկարահանվել է այս սերիալում, մեզ հետ զրույցում ասել էր, որ այն դաստիարակչական նպատակ ունի: Սակայն սերիալում անչափահասներն օգտագործում են փողոցային բառապաշար և քրեական ենթամշակույթին բնորոշ պահվածք ցուցաբերում, իսկ ծեծկռտուքի ու դանակով հարց լուծելու տեսարանների պակաս չկա: Մասնագետները նշում են` եթե անգամ հեղինակները նպատակ են ունեցել սովորեցնել, որ չի կարելի խնդիրները լուծել կռվի, ծեծուջարդի միջոցով, ավելի հավանական է, որ անչափահասներն էկրանին տեսածը կընդունեն որպես վարքի մոդել և կկրկնօրինակեն այն։
Արփի Հակոբյան
